بۇگىن «قازمۇنايگاز» ۇك اق (قمگ) باسقارما ءتوراعاسى ماعزۇم مىرزاعالييەۆ باكۋ قالاسىنا ساپارى بارىسىندا ازەربايجان رەسپۋبليكاسىنىڭ مەملەكەتتىك مۇناي كومپانياسىنىڭ (SOCAR) پرەزيدەنتى روۆشان نادجافپەن كەزدەستى.

تاراپتار باكۋ-تبيليسي-دجەيحان مۇناي قۇبىرى ارقىلى تاسىمالداناتىن قازاقستان مۇنايىنىڭ كولەمىن كەزەڭ-كەزەڭىمەن ۇلعايتۋدى جانە قازاقستان مۇنايىن باكۋ-سۋپسا قۇبىرى ارقىلى تاسىمالداۋ ماسەلەلەرىن تالقىلادى.

— SOCAR كومپانياسى قازمۇنايگازدىڭ ماڭىزدى ستراتەگيالىق سەرىكتەسى. قازاقستان مۇنايى ءترانزيتىنىڭ كولەمىن كەزەڭ-كەزەڭىمەن ۇلعايتۋ ارقىلى ءوزارا ءتيىمدى ىنتىماقتاستىقتىڭ دامۋىنا جاڭا سەرپىن بەرىلەتىنىنە سەنىمدىمىن، — دەدى م.مىرزاعالييەۆ.

ايتا كەتسەك، «قازمۇنايگاز» جانە SOCAR اراسىندا 1،5 ملن توننا قازاقستان مۇنايىن ازەربايجان اۋماعى ارقىلى تاسىمالداۋعا قاتىستى قول قويىلعان كەلىسىم اياسىندا قازاقستان مۇنايى بىلتىردان بەرى اقتاۋ – باكۋ – دجەيحان باعىتى بويىنشا تۇراقتى تاسىمالدانىپ كەلەدى.

اقتاۋ پورتىنان 2023 جىلدىڭ قورىتىندىسى بويىنشا 1 057 مىڭ توننا، ال 2024 جىلدىڭ قاڭتار-اقپان ايلارىندا 232 مىڭ توننا مۇناي جونەلتىلدى.