Qazyǵurt aýdanyndaǵy «Paseka-Bal» sharýa qojalyǵy jylyjaı óndirisin damytýda. 2010 jyly iske qosylǵan qojalyqtyń qazir 18 gektar egistik jeri bar. Onyń ishinde jylyjaı kólemi – 1,46 gektar– dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Búginde sharýashylyqta gúl ósiretin úsh jylyjaı bar. Onda jylyna 1 mıllıonnan astam gúl qyrqylady.

Sharýanyń gúl baǵynda raýshannyń «Misty Bubbles», «Katalına», «Qara sıqyr» dep atalatyn úsh túri ósiriledi.

Sharýa qojalyqtyń tóraǵasy Azızbek Qasymovtyń sózinshe, bir ǵana jylyjaıdyń ózinen jylyna 400 myńǵa deıin gúl qyrqylady. Ónimdi Shymkent, Almaty, Qyzylorda qalalaryna jóneltedi.

Gúlderdiń ortasha baǵasy - 150-170 teńge. Búginde jylyjaıda turaqty 15 adam jumys isteıdi.

Aıta ketsek, Respýblıkada salynǵan jylyjaılardyń 70%-y Túrkistan oblysyna tıesili. Oblystaǵy jylyjaılardyń jalpy kólemi – 1 640 gektar. Ótken jyly jalpy jylyjaılardan 140 myń tonna ónim jınalyp, respýblıka halqynyń 42%-y kókónispen qamtamasyz etilgen.