Almatyda qazaqtyń ulttyq sportyn keńinen nasihattaý maqsatynda alǵash ret «QASQYR CUP» aýdaryspaq týrniri ótip, oǵan blogerler men sportshylardan quralǵan 20 qatysýshy qatysty, dep habarlaidy dalanews.kz.
Týrnirdiń ereksheligi – aýdaryspaqtan buryn-sońdy at ústinde kúresip kórmegen blogerler men media ókilderiniń de jarysqa qatysýy. Qatysýshylar ártúrli salmaq dárejeleri boiynsha kúsh synasyp, kórermenderge ulttyq sporttyń ereksheligin kórsetti.
Týrnirge Abai Asylhan, Faizýlla Naǵashybai, Medet Janabai, Aitbek Tursynbai, Meiirjan Tóleqas, Ashat Nurmashev, Muhit Amantań, Ertýǵan Amangeldi, Manas Jarylqasynov, Maqsat Qiqymov, Azamat Baqytov, Medet Janatuly, Arnur Qabdollaev, Oljashan Qairat syndy blogerler, aityskerler jáne MMA sheberleri qatysty.
Uiymdastyrýshylardyń aitýynsha, óz qarsylasyn jeńgen qatysýshylardyń árqaisysyna 500 myń teńge kóleminde syiaqy berildi.
Týrnirge alǵash ret qyzdar da qatysty. «Bopai» laqap atymen tanymal Zámzágúl Faizollina men «Tomiris» atanǵan Gúlmaral Erkebaeva at ústinde aýdaryspaq erejesi boiynsha kúsh synasty.
Jekpe-jektiń bitýine sanaýly sekýndtar qalǵanda Gúlmaral qarsylasyn attan aýdaryp túsirip, jeńiske jetti. Osylaisha qazaq kúresi men erkin kúresten tájiribesi bar eki sportshy qyzdyń básekesinde Gúlmaral basym tústi.
«Aýdaryspaqtan ótken sheshýshi aiqasymyzda jeńiske jetip, trilogiiamyz osymen aiaqtaldy. Atqa minip júrgenimizben, attyń ústinde kúresý úshin rýh kerek ekenin túsindim. Bir jaǵynan atty basqarsań, ekinshi jaǵynan adammen arpalysasyń. Keshe ǵana jattyǵyp, búgin saiysqa shyǵyp kettik. Basynda qorqynysh boldy, sebebi attyń ústinde kúresý kóp qazaq jigitiniń qolynan kele bermeidi. Qyzdardyń atqa qonaǵany árbir qazaq jigitine syn bolary anyq. Kúsh bilekte emes, júrekte. Qazaq qyzdarynyń rýhyn, minezin kórsetkisi keldi», – dedi Gúlmaral Serikbaeva.
Týrnirde Nigeriiadan kelgen Muhammad esimdi qatysýshy da óner kórsetti. Ol aýdaryspaq erejesin qysqa ýaqyt ishinde meńgerip, jarys barysynda qarsylasyn 11 sekýndta attan qulatyp, jeńiske jetti.
«Jeńiske jetetinime eshkim senbedi, sebebi qarsylasymnyń salmaǵy aýyr edi. Al men ózime sendim. Jarystarǵa qatysyp júrgen soń, qarsylasymdy jeńý úshin aldymen ózińmen kúresý kerek ekenin jaqsy bilemin. Ári fýtbolshymyn. Bala kezimde bokspen ainalystym. Sondyqtan qarsylasymdy jeńý úshin barymdy saldym. Aýdaryspaq maǵan qatty unady. Taǵy da jarystarǵa qatysqym keledi. Búgingi jeńisime elde qalǵan anam, baýyrlarym qýantatyn boldy. Qazaq tilin úirenip júrmin. Osyndai múmkindikterge jol ashqan Qazaqstanǵa alǵysym sheksiz», – dedi Muhammad.
«QASYQYR CUP» qatysýshylarynyń biri ári jeńiske jetken ASARUME qaiyrymdylyq qorynyń basshysy Ashat Nurmashev týrnir kezinde bir otbasyna úi syilaǵanyn aitty.
«Biz búgin qaisar minezimizdi kórsetip qana qoimai, Talǵardaǵy jalǵyzbasty anaǵa úi syilap, jaqsylyq jasadyq. Uly báigege qatysyp, qazaqtyń ulttyq oiynynyń boiyna sińirip júr. Osy sanymyz 20 adam úles qosty. Aýdaryspaqta jan-jaqty bolý kerek. Tepe-teńdikti saqtaý ári kúresi ońai emes. Almatyda ǵana emes, týǵan jerim Aqtóbe qalasyna baryp, chempion atanyp júrgen aýdaryspaq komandasynan sabaq aldym. Bul týrnir jalǵasyn tabýy kerek. Keler jyly basqa qatysýshylar óner kórsetedi degen oidamyn. Osyndai genetikalyq kodymyzdy elge taratýymyz kerek», – dedi Ashat Nurmashev.
Aýdaryspaq – eki salt attynyń at ústindegi kúresi. Balýandar at ústinde kúsh synasyp, bir-birin belden basyp nemese tartyp jerge qulatýǵa tyrysady. Qazaqtyń ulttyq sporty Dúniejúzilik kóshpendiler oiyndarynyń baǵdarlamasyna da engizilgen.
Biyl aqpan aiynda Qyrǵyzstanda ótken oiyndarda Qazaqstan quramasy alty salmaq dárejesi boiynsha synǵa túsip, tórt altyn, bir kúmis jáne bir qola medal jeńip alǵan.
«QASYQYR CUP» týrniriniń bas demeýshisi – Zigi-Zagi kompaniiasy. Uiymdastyrýshylar aýdaryspaqty halyq arasynda keńinen nasihattaý maqsatynda týrnirdi aldaǵy ýaqytta da ótkizýdi josparlap otyr.
