«Qazaqtelekom» Stepnogorsk qalasynda mys jelilerine qyzmet kórsetetin sońǵy ATS S&S08 stantsiiasyn óshirip, ADSL internetiniń dáýirin resmi túrde aiaqtady. Bul stantsiia 20 jyldan astam ýaqyt boiy 10 myńnan astam tutynýshyǵa telefon bailanysy men eskirgen mys tehnologiiasyndaǵy internet qyzmetterin úzdiksiz usynǵan, dep habarlaidy Dalanews.kz.
Eske sala keteiik, bir jyl buryn «Qazaqtelekom» Stepnogorsk qalasyn tolyǵymen talshyqty-optikalyq jelimen qamtý jobasyn aiaqtaǵan bolatyn. Nátijesinde Aqmola oblysyndaǵy bul qala tolyq «optikalyq» deńgeige ótti. Degenmen optikalyq infraqurylym bolǵanyna qaramastan, eskirgen mys jelileriniń tehnologiiasyn demontajdaý aiaqtalǵanǵa deiin ATS stantsiialary jumysyn jalǵastyryp kelgen edi.
«Eskirgen mys jelilerinen bas tartyp, olardyń ornyn optikalyq jelilermen almastyrý – 2022 jyly bastalǵan «Tazartý» jobasynyń basty maqsaty. Baǵdarlama iske qosylǵan sátten bastap, elimiz boiynsha 260 myńnan astam tutynýshynyń infraqurylymy jańartyldy, onyń ishinde 11 myńnan astamy - Stepnogorsk qalasynyń turǵyndary», – dep málimdedi «Qazaqtelekom» AQ bas tehnikalyq direktory Samat Týǵanbaev.
Al zamanaýi tehnologiiany tańdaǵan alǵashqy tutynýshynyń biri – Vladislav Mamin. Ol optikalyq jelige alǵashqylardyń biri bolyp qosylǵan. 
«Men alǵashqylardyń biri bolyp Megaline-ǵa qosylyp, internetke qol jetkizdim. Ýaqyt óte kele jyldam internettiń qajettiligi arta tústi, ásirese keshki ýaqytta baiaý jumys istep, messendjerlerde bailanys ornatý qiyndyq týdyrdy. Optikalyq jelige kóshkennen keiin otbasymyz internet jyldamdyǵynyń 30 ese artqanyn jáne eshteńeniń «qatyp qalmaitynyn» birden baiqady. Qosylý úderisi óte yńǵaily jáne jyldam bolǵany úshin kompaniiaǵa alǵys aitamyn», – dedi Vladislav Mamin.
«Tazartý» jobasy aiasynda klientterdi mys jelilerinen optikalyq jelilerge aýystyrý Qazaqstannyń basqa óńirlerinde de belsendi túrde jalǵasyp jatyr. Biyldyń ózinde 45 myńnan astam paidalanýshy optikaǵa aýysty. Klientter GPON tehnologiiasyn tańdaidy, sebebi ol 500 Mbit/s-qa deiingi joǵary jyldamdyq pen ótkizý qabiletin qamtamasyz etedi. Bul ásirese striming, onlain oiyndar jáne úlken kólemdegi derektermen jumys isteý úshin mańyzdy.
Sonymen qatar klientter úshin bailanys turaqtylyǵy men senimdiligi de úlken mańyzǵa ie. Optikalyq jeliler elektromagnittik kedergiler men aýa raiynyń qolaisyz jaǵdailaryna tózimdi, bul bailanys sapasyn joǵaltpai, úzilissiz jumys isteýge múmkindik beredi.
Kompaniia mys jelilerin tolyǵymen aýystyrý jobasyn aldaǵy birneshe jyl ishinde aiaqtaýdy josparlap otyr. Infraqurylymdy jańartý tek jelilerdiń sapasy men senimdiligin jaqsartýǵa ǵana emes, sondai-aq qazaqstandyqtardyń joǵary jyldamdyqty internet pen tsifrlyq qyzmetterge degen ósip kele jatqan qajettiligin qanaǵattandyrýǵa múmkindik beredi.
