Búgin Astana ýaqytymen saǵat 11:30-da Qazaqstan qor birjasy (KASE) "Qazaqtelekomnyń" artyqshylyqqa ie aktsiialarynyń baǵasy 52,71% - ǵa tómendep, soǵan bailanysty saýda-sattyq kilt toqtatyldy, dep habarlaidy Dalanews.kz qor birjasy usynǵan aqparatqa silteme jasap.
"Qazaqtelekomnyń" aktsiialary "premiým" sanatyndaǵy KASE-niń basty alańynda ornalasqan.
"23 mamyrda jasalǵan baǵaly qaǵazdar saýda-sattyǵy boiynsha sońǵy mámilede bir aktsiia baǵasy 50 330,00 teńgeni quraǵan. Al 26 mamyrda 23 800,00 teńge baǵamen jasalǵan mámile soń saýda-sattyq toqtatyldy", delingen habarlamada.
Saýda-sattyqty toqtatý ishki erejelerge súienedi, oǵan sáikes saýda-sattyq aldyńǵy saýda kúni jabylǵan kezde qalyptasqan baǵaǵa qatysty aktsiialardyń quny 30 paiyzǵa nemese odan da kóp tómendegende toqtatylýy múmkin. Bul jaǵdaida saýda-sattyqty toqtata turý KASE saýda júiesinde avtomatty túrde júzege asyrylady.
Aita ketsek, 2025 jyldyń 22 mamyrynda KASE "Qazaqtelekomnyń" jai aktsiialary boiynsha saýda-sattyqty kilt doǵaryp, bul jaitty baǵanyń bir kún burynǵysynan 31,5%-ǵa tómendeýimen bailanystyrdy.
"2025 jyldyń 21 mamyrynda jasalǵan kelisimsharttarda atalǵan bir jai aktsiianyń quny 58 400 teńge bolǵan, al 22 mamyrda saýda-sattyq toqtatylǵan kezde jasalyp úlgerilgen mámilede bir aktsiia quny shamamen 39 999 teńgeni quraǵan. Ol kezde de saýda-sattyqty toqtatýǵa týra kelgen", delingen birja habarlamasynda.
2025 jylǵy 1 sáýirdegi KASE derekteri boiynsha, "Qazaqtelekom" AQ-tyń majoritarlyq aktsioneri "Samuryq-Qazyna" UÁQ" AQ bolyp tabylady (jai aktsiialardyń 80,85%-y nemese barlyq aktsiialardyń 71,32%-y). Telecom Systems LTD jekemenshik kompaniiasyna 9,19% jai aktsiialar nemese barlyq aktsiialardyń 8,1%-y tiesili. 2025 jylǵy 1 sáýirdegi jaǵdai boiynsha, "Qazaqtelekom" AQ-tyń 10,7 mln qarapaiym jáne 298 785 artyqshylyqqa ie aktsiialary ainalymda júr.
Buǵan deiin saitymyzda 2025 jyldyń I-toqsanynda Qazaqstandaǵy naqty ailyq jalaqy kólemi ótken jyldyń osy kezeńimen salystyrǵanda 1,2%-ǵa óskenin, jalaqy ósiminiń negizgi draiveri – telekommýnikatsiia salasy ekenin jazǵanbyz.
