Dýbaida dúnie-múlikteri bar qazaqstandyq sheneýnikterge qatysty tergeý amaldary júrip jatyr. Bul týraly kýlýar qabyrǵasynda QR Bas prokýrorynyń orynbasary Ǵalymjan Qoigeldiev málim etti, – dep habarlaidy Dalanews.kz Massaget.kz-ke siltep.
Jýrnalister sheneýnikterdiń Dýbaida múlikteri bar ekendigi jónindegi aqparattar boiynsha qandai sharalar qabyldanatynyn surady. Ǵalymjan Qoigeldiev bul máseleniń vedomstvo baqylaýynda ekenin atap ótti.
«Birqatar sheneýnikterdiń zańsyz múlik jinaqtaýy men shetelde jasyrynyp júrgen tulǵalarǵa qatysty tergeý amaldary Emiratpen birlesip júrgizilýde. Mundai tergeýler uzaq ýaqytty talap etedi, keibir protsester bir jyldan astam ýaqytqa sozylýy múmkin», – dedi ol.
Qoigeldievtiń aitýynsha, bul is boiynsha salyq qyzmeti, qarjy monitoringi agenttigi jáne Sybailas jemqorlyqqa qarsy is-qimyl agenttigi birlesip jumys isteidi.
«Biz baqylaýdy kúsheitip otyrmyz, biraq tolyq málimetterdi jariia etýge quqyǵym joq», – dep atap ótti Bas prokýrordyń orynbasary.
Buǵan deiin Dýbaida májilistiń eks-tóraǵasy Nurlan Nyǵmatýlinniń áieli Venera Baimurzaevanyń atyna tirkelgen 50 shaqty jyljymaityn múlik anyqtalǵanyn jazǵan edik.
Tizim basynda 860 sharshy metrlik úi. Living Legends dep atalatyn kottedj qalashyǵyndaǵy múliktiń quny shamamen 670 million teńge.
Fairooz dep atalatyn ǵimaratta Venera Baimurzaevanyń atyna aýmaǵy 500 sharshy metr apartament tirkelgen. Onyń naryqtaǵy quny shamamen 850 million teńge.
"Azattyq" derekteri boiynsha, Venera Baimurzaeva budan bólek premiým sanattaǵy birneshe páterdiń iesi. Mysaly ol DM MESK ǵimaratynda jalpy quny jarty milliard teńgelik eki páter Baimurzaevaǵa tiesili.
Sondai-aq Royal Oceanic ǵimaratynda 270 million turatyn apartament, Regal ǵimaratynda 250 million teńgelik páterdiń, Bahar kesheninde 150 million teńgelik páterdiń iesi.
Sonymen qatar, Dýbaida Venera Baimurzaevanyń qudaǵiy Maǵda Ydyrysovamen birigip alǵan 42 páteri bar. Olardyń bári ǵimarattyń 14-qabatynda ornalasqan úiler. Iaǵni qaladaǵy bir úi tolyǵymen ekeýiniń ieliginde.
Sonymen qatar, munai salasyndaǵy bai-baǵlandardyń da Dýbaida páterleri bar ekeni anyqtaldy.
"Mańǵystaý munai gaz" kompaniialaryna jetekshilik etken, ári Mańǵystaý oblysyn basqarǵan Alik Aidarbaev Palm Jumeirah aralyndaǵy Kempinski saraiynan 165 sharshy metr eki bólmeli páterdiń iesi. Páter baǵasy jarnama saittarynda kemi 600 million teńge dep tur.
Azattyq málimetinshe, Aidarbaev bul páterdi "Qazmunaigaz" basshylyǵynan ketken kezde, iaǵni 2022 jyly satyp alǵan. Al Alik Aidarbaevtyń týǵan inisi Erjan Aidarbaev Dýbaidyń ortalyǵynan úsh apartament satyp alǵan. Olardyń jalpy quny 660 million teńge.
"Qaztransgazdy" birneshe jyl basqarǵan Serik Sultanǵali Dýbaidaǵy DAMAC Hills villa qalashyǵyndaǵy páterdiń iesi. Úidiń aýmaǵy 647 sharshy metr.
Sonymen qatar, Serik Estai esimdi qazaqstandyq álemdegi eń biik ǵimarat Býrj Halifanyń janynda ornalasqan turǵyn úiden 7 apartament satyp alypty. Olardyń eń arzany 150 million bolsa, eń úlken úii 450 million teńgege deiin barady.
7 úidiń quny - 1,8 milliard teńge. Serik Estai "Qaztransgaz" qurylymdarynda basshylyq qyzmet atqarǵan.
Palm Jumeirah aralyndaǵy taǵy páterdiń iesi - Qazaqstan azamaty Panýar Omarova. Aýmaǵy 620 sharshy metr úidiń quny shamamen 3 milliard teńge.
