دۋبايدا دۇنيە-مۇلىكتەرى بار قازاقستاندىق شەنەۋنىكتەرگە قاتىستى تەرگەۋ امالدارى ءجۇرىپ جاتىر. بۇل تۋرالى كۋلۋار قابىرعاسىندا ق ر باس پروكۋرورىنىڭ ورىنباسارى عالىمجان قويگەلدييەۆ ءمالىم ەتتى، – دەپ حابارلايدى Dalanews.kz Massaget.kz-كە سىلتەپ.
جۋرناليستەر شەنەۋنىكتەردىڭ دۋبايدا مۇلىكتەرى بار ەكەندىگى جونىندەگى اقپاراتتار بويىنشا قانداي شارالار قابىلداناتىنىن سۇرادى. عالىمجان قويگەلدييەۆ بۇل ماسەلەنىڭ ۆەدومستۆو باقىلاۋىندا ەكەنىن اتاپ ءوتتى.
«ءبىرقاتار شەنەۋنىكتەردىڭ زاڭسىز مۇلىك جيناقتاۋى مەن شەتەلدە جاسىرىنىپ جۇرگەن تۇلعالارعا قاتىستى تەرگەۋ امالدارى ەميراتپەن بىرلەسىپ جۇرگىزىلۋدە. مۇنداي تەرگەۋلەر ۇزاق ۋاقىتتى تالاپ ەتەدى، كەيبىر پروسەستەر ءبىر جىلدان استام ۋاقىتقا سوزىلۋى مۇمكىن»، – دەدى ول.
قويگەلدييەۆتىڭ ايتۋىنشا، بۇل ءىس بويىنشا سالىق قىزمەتى، قارجى مونيتورينگى اگەنتتىگى جانە سىبايلاس جەمقورلىققا قارسى ءىس-قيمىل اگەنتتىگى بىرلەسىپ جۇمىس ىستەيدى.
«ءبىز باقىلاۋدى كۇشەيتىپ وتىرمىز، ءبىراق تولىق مالىمەتتەردى جاريا ەتۋگە قۇقىعىم جوق»، – دەپ اتاپ ءوتتى باس پروكۋروردىڭ ورىنباسارى.
بۇعان دەيىن دۋبايدا ءماجىلىستىڭ ەكس-توراعاسى نۇرلان ءنىعماتۋليننىڭ ايەلى ۆەنەرا بايمۇرزايەۆانىڭ اتىنا تىركەلگەن 50 شاقتى جىلجىمايتىن مۇلىك انىقتالعانىن جازعان ەدىك.
ءتىزىم باسىندا 860 شارشى مەترلىك ءۇي. Living Legends دەپ اتالاتىن كوتتەدج قالاشىعىنداعى مۇلىكتىڭ قۇنى شامامەن 670 ميلليون تەڭگە.
Fairooz دەپ اتالاتىن عيماراتتا ۆەنەرا بايمۇرزايەۆانىڭ اتىنا اۋماعى 500 شارشى مەتر اپارتامەنت تىركەلگەن. ونىڭ نارىقتاعى قۇنى شامامەن 850 ميلليون تەڭگە.
"ازاتتىق" دەرەكتەرى بويىنشا، ۆەنەرا بايمۇرزايەۆا بۇدان بولەك پرەميۋم ساناتتاعى بىرنەشە پاتەردىڭ يەسى. مىسالى ول DM MESK عيماراتىندا جالپى قۇنى جارتى ميلليارد تەڭگەلىك ەكى پاتەر بايمۇرزايەۆاعا تيەسىلى.
سونداي-اق Royal Oceanic عيماراتىندا 270 ميلليون تۇراتىن اپارتامەنت، Regal عيماراتىندا 250 ميلليون تەڭگەلىك پاتەردىڭ، Bahar كەشەنىندە 150 ميلليون تەڭگەلىك پاتەردىڭ يەسى.
سونىمەن قاتار، دۋبايدا ۆەنەرا بايمۇرزايەۆانىڭ قۇداعيى ماعدا ىدىرىسوۆامەن بىرىگىپ العان 42 پاتەرى بار. ولاردىڭ ءبارى عيماراتتىڭ 14-قاباتىندا ورنالاسقان ۇيلەر. ياعني قالاداعى ءبىر ءۇي تولىعىمەن ەكەۋىنىڭ يەلىگىندە.
سونىمەن قاتار، مۇناي سالاسىنداعى باي-باعلانداردىڭ دا دۋبايدا پاتەرلەرى بار ەكەنى انىقتالدى.
"ماڭعىستاۋ مۇناي گاز" كومپانيالارىنا جەتەكشىلىك ەتكەن، ءارى ماڭعىستاۋ وبلىسىن باسقارعان اليك ايداربايەۆ Palm Jumeirah ارالىنداعى Kempinski سارايىنان 165 شارشى مەتر ەكى بولمەلى پاتەردىڭ يەسى. پاتەر باعاسى جارناما سايتتارىندا كەمى 600 ميلليون تەڭگە دەپ تۇر.
ازاتتىق مالىمەتىنشە، ايداربايەۆ بۇل پاتەردى "قازمۇنايگاز" باسشىلىعىنان كەتكەن كەزدە، ياعني 2022 جىلى ساتىپ العان. ال اليك ايداربايەۆتىڭ تۋعان ءىنىسى ەرجان ايداربايەۆ دۋبايدىڭ ورتالىعىنان ءۇش اپارتامەنت ساتىپ العان. ولاردىڭ جالپى قۇنى 660 ميلليون تەڭگە.
"قازترانسگازدى" بىرنەشە جىل باسقارعان سەرىك سۇلتانعالي دۋبايداعى DAMAC Hills ۆيللا قالاشىعىنداعى پاتەردىڭ يەسى. ءۇيدىڭ اۋماعى 647 شارشى مەتر.
سونىمەن قاتار، سەرىك ەستاي ەسىمدى قازاقستاندىق الەمدەگى ەڭ بيىك عيمارات بۋرج حاليفانىڭ جانىندا ورنالاسقان تۇرعىن ۇيدەن 7 اپارتامەنت ساتىپ الىپتى. ولاردىڭ ەڭ ارزانى 150 ميلليون بولسا، ەڭ ۇلكەن ءۇيى 450 ميلليون تەڭگەگە دەيىن بارادى.
7 ءۇيدىڭ قۇنى - 1،8 ميلليارد تەڭگە. سەرىك ەستاي "قازترانسگاز" قۇرىلىمدارىندا باسشىلىق قىزمەت اتقارعان.
Palm Jumeirah ارالىنداعى تاعى پاتەردىڭ يەسى - قازاقستان ازاماتى پانۋار وماروۆا. اۋماعى 620 شارشى مەتر ءۇيدىڭ قۇنى شامامەن 3 ميلليارد تەڭگە.
