Qazaqstannyń taza halyqaralyq rezervi tarihi turǵyda jańa rekord ornatyp, 105 milliard dollardan asty. Bul málimetti ekonomist Ǵalymjan Aitqazin naqtylady, dep habarlaidy Dalanews.kz.
"Ulttyq banktiń aldyn ala usynǵan málimetine súiensek,qyrkúiekte erkin aiyrbastalatyn valiýta (EAV), altyn túrindegi aktivterdi jáne Ulttyq qordan turatyn Qazaqstannyń taza halyqaralyq rezervi 105,1 mlrd dollardy qurady. Al bul kórsetkish aldaǵy tamyz aiynda ǵana 103,1 mlrd dollar bolatyn. Sońǵy ret taza rezervterdiń aǵymdaǵy kórsetkishine 2014 jyldyń qarashasynda qol jetkizilgen bolatyn. Sonymen, qyrkúiek aiynda taza altyn-valiýta qory (AVQ) nemese EAV + altyn, mindettemelerdi shegerip tastaǵanda, 42,5 milliard dollarǵa deiin ósti. Qyrkúiek aiynda altyn-valiýta qoryndaǵy altynnyń úlesi úshinshi ai qatarynan 55% deńgeiin saqtap qaldy, al erkin aiyrbastalatyn valiýta túrindegi aktivterdiń úlesi tiisinshe 45% qurady", - dep jazdy Ǵalymjan Aitqazin Telegram-daǵy arnasynda.
Osy jyldyń aqpan aiynan bastap "Ulttyq qor – balalarǵa" baǵdarlamasy boiynsha mindettemeleri shegerilip kórsetiletin Ulttyq qordyń aktivteri qyrkúiek aiynda ósimin jalǵastyryp, 62,7 mlrd dollardy qurady. Bul, ekonomist atap ótkendei, 2017 jylǵy sáýirden bergi joǵary kórsetkish.
"Qazaqstannyń syrtqy táýekelderge qarsy qabyldaǵan "qorǵanysy" el ekonomikasynyń tarihyndaǵy eń zory bolyp tabylady. Aǵymdaǵy biýdjet daǵdarysy úkimetti Ulttyq qordan alynatyn aqsha kólemin ulǵaitýǵa májbúr etkenin basa aita ketken jón", - dep jazdy sarapshy.
Aita ketsek,2024 jylǵy qazan aiynda Ulttyq bank Ulttyq qordan 1,4 mlrd AQSh dollaryna deiingi mólsherde valiýta shyǵaryp, satpaqshy. Sondai-aq respýblikalyq biýdjetke transfertterdi qamtamasyz etý úshin qyrkúiekte Ulttyq qordan 945 mln AQSh dollar kóleminde valiýta satylǵany habarlanǵan.
