قازاقستاننىڭ تازا حالىقارالىق رەزەرۆى تاريحي تۇرعىدا جاڭا رەكورد ورناتىپ، 105 ميلليارد دوللاردان استى. بۇل مالىمەتتى ەكونوميست عالىمجان ايتقازين ناقتىلادى، دەپ حابارلايدى Dalanews.kz.
"ۇلتتىق بانكتىڭ الدىن الا ۇسىنعان مالىمەتىنە سۇيەنسەك،قىركۇيەكتە ەركىن ايىرباستالاتىن ۆاليۋتا (ەاۆ)، التىن تۇرىندەگى اكتيۆتەردى جانە ۇلتتىق قوردان تۇراتىن قازاقستاننىڭ تازا حالىقارالىق رەزەرۆى 105،1 ملرد دوللاردى قۇرادى. ال بۇل كورسەتكىش الداعى تامىز ايىندا عانا 103،1 ملرد دوللار بولاتىن. سوڭعى رەت تازا رەزەرۆتەردىڭ اعىمداعى كورسەتكىشىنە 2014 جىلدىڭ قاراشاسىندا قول جەتكىزىلگەن بولاتىن. سونىمەن، قىركۇيەك ايىندا تازا التىن-ۆاليۋتا قورى (اۆق) نەمەسە ەاۆ + التىن، مىندەتتەمەلەردى شەگەرىپ تاستاعاندا، 42،5 ميلليارد دوللارعا دەيىن ءوستى. قىركۇيەك ايىندا التىن-ۆاليۋتا قورىنداعى التىننىڭ ۇلەسى ءۇشىنشى اي قاتارىنان 55% دەڭگەيىن ساقتاپ قالدى، ال ەركىن ايىرباستالاتىن ۆاليۋتا تۇرىندەگى اكتيۆتەردىڭ ۇلەسى تيىسىنشە 45% قۇرادى"، - دەپ جازدى عالىمجان ايتقازين Telegram-داعى ارناسىندا.
وسى جىلدىڭ اقپان ايىنان باستاپ "ۇلتتىق قور – بالالارعا" باعدارلاماسى بويىنشا مىندەتتەمەلەرى شەگەرىلىپ كورسەتىلەتىن ۇلتتىق قوردىڭ اكتيۆتەرى قىركۇيەك ايىندا ءوسىمىن جالعاستىرىپ، 62،7 ملرد دوللاردى قۇرادى. بۇل، ەكونوميست اتاپ وتكەندەي، 2017 جىلعى ساۋىردەن بەرگى جوعارى كورسەتكىش.
"قازاقستاننىڭ سىرتقى تاۋەكەلدەرگە قارسى قابىلداعان "قورعانىسى" ەل ەكونوميكاسىنىڭ تاريحىنداعى ەڭ زورى بولىپ تابىلادى. اعىمداعى بيۋدجەت داعدارىسى ۇكىمەتتى ۇلتتىق قوردان الىناتىن اقشا كولەمىن ۇلعايتۋعا ءماجبۇر ەتكەنىن باسا ايتا كەتكەن ءجون"، - دەپ جازدى ساراپشى.
ايتا كەتسەك،2024 جىلعى قازان ايىندا ۇلتتىق بانك ۇلتتىق قوردان 1،4 ملرد اقش دوللارىنا دەيىنگى مولشەردە ۆاليۋتا شىعارىپ، ساتپاقشى. سونداي-اق رەسپۋبليكالىق بيۋدجەتكە ترانسفەرتتەردى قامتاماسىز ەتۋ ءۇشىن قىركۇيەكتە ۇلتتىق قوردان 945 ملن اقش دوللار كولەمىندە ۆاليۋتا ساتىلعانى حابارلانعان.
