Ózin qoǵamdyq belsendi retinde tanystyrǵan bloger Túrkistan oblysynda bopsalaýǵa kúdikti retinde ustaldy, dep habarlaidy Dalanews.kz.
Vedomstvonyń aqparattyq mediaportalynyń habarlaýynsha, Túrkistan oblysy PD uiymdasqan qylmysqa qarsy kúres basqarmasynyń qyzmetkerleri jedel-izdestirý sharalary barysynda 32 jastaǵy bloger áieldi ustaǵan.
Qazaqstan Respýblikasynyń Ishki ister ministrligi málimetinshe, aldyn ala derek boiynsha, kúdikti ózin qoǵamdyq belsendi retinde kórsetip, Keles aýdanyna qarasty meditsinalyq mekeme basshysynan áleýmettik jelilerde bedeline nuqsan keltiretin material taratpaý úshin 1 million teńge talap etken.
Atalǵan derek boiynsha qylmystyq is qozǵaldy. Aiǵaq zattar tárkilendi. Qazirgi ýaqytta oqiǵanyń barlyq mán-jaiyn anyqtaýǵa baǵyttalǵan sotqa deiingi tergeý amaldary júrgizilip jatyr.
