ءوزىن قوعامدىق بەلسەندى رەتىندە تانىستىرعان بلوگەر تۇركىستان وبلىسىندا بوپسالاۋعا كۇدىكتى رەتىندە ۇستالدى، دەپ حابارلايدى Dalanews.kz.
ۆەدومستۆونىڭ اقپاراتتىق مەدياپورتالىنىڭ حابارلاۋىنشا، تۇركىستان وبلىسى پد ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى جەدەل-ىزدەستىرۋ شارالارى بارىسىندا 32 جاستاعى بلوگەر ايەلدى ۇستاعان.
قازاقستان رەسپۋبليكاسىنىڭ ىشكى ىستەر مينيسترلىگى مالىمەتىنشە، الدىن الا دەرەك بويىنشا، كۇدىكتى ءوزىن قوعامدىق بەلسەندى رەتىندە كورسەتىپ، كەلەس اۋدانىنا قاراستى مەديسينالىق مەكەمە باسشىسىنان الەۋمەتتىك جەلىلەردە بەدەلىنە نۇقسان كەلتىرەتىن ماتەريال تاراتپاۋ ءۇشىن 1 ميلليون تەڭگە تالاپ ەتكەن.
اتالعان دەرەك بويىنشا قىلمىستىق ءىس قوزعالدى. ايعاق زاتتار تاركىلەندى. قازىرگى ۋاقىتتا وقيعانىڭ بارلىق ءمان-جايىن انىقتاۋعا باعىتتالعان سوتقا دەيىنگى تەرگەۋ امالدارى جۇرگىزىلىپ جاتىر.
