69 jasqa qaraǵan shaǵynda Qazaqstannyń eńbek sińirgen qairatkeri, kórnekti akter Qairat Kemalov ómirden ótti. Ol búkil sanaly ǵumyryn kino jáne teatr salasyna arnady. Akter "Qazaq handyǵy" filminde Kerei hannyń rólin somdaý arqyly kórermender kózaiymyna ainalǵan edi, dep habarlaidy Dalanews.kz.
Qaraly habarmen Qaraǵandy oblysynyń ákimi Ermaǵanbet Bólekbaev jelidegi paraqshasynda bólisti.
"Qairat Kemalovtyń ónerdegi mansaby Qaraǵandyda bastalǵan edi. Onyń ónerdegi jetistikteri halyqaralyq dárejede joǵary baǵalanyp, túrli marapattarǵa ie boldy. Ol túrli tarihi obrazdardy somdaýda akterlik sheberligimen kórine bildi. Shyǵarmashylyq jolynda ol kórermenderge klassikadan bastap zamanaýi qoiylymdarǵa deiin júzdegen rólderdi syilady. Ol sheberligi, mamandyqqa degen úlken adaldyǵy arqasynda otandyq teatr jáne kino tarihynda tereń iz qaldyrdy. Qairat Kemalovtyń jarqyn beinesi áriptesteriniń, shákirtteri men dostarynyń, kórermenderdiń júreginde máńgi qalady", delingen ákimniń kóńil aitý jazbasynda.
Qairat Kemalov 1957 jyly 8 qańtarda Jezqazǵan oblysy Jańaarqa aýdany Atasý aýylynda dúniege kelgen. Sáken Seifýllin atyndaǵy Qaraǵandy oblystyq akademiialyq qazaq drama teatrynyń akteri, Qazaqstannyń eńbek sińirgen qairatkeri, "Parasat" ordeniniń iegeri jáne Qaraǵandynyń qurmetti azamaty bolǵan edi.
