Qazaqstanǵa «Jabaiy jylqylardy qaitarý – 2026» baǵdarlamasy aiasynda Prjevalskii jylqysynyń tórt aiǵyry jetkizildi. Bul týraly Praga haiýanattar baǵynyń baspasóz qyzmeti málimdedi, dep habarlaidy dalanews.kz.
Habarlamada janýarlardyń 15 saǵatqa sozylǵan áýe sapary men eki márte aýysyp minýden keiin Qostanaiǵa aman-esen jetkeni aitylǵan.
«Biz Qazaqstandamyz! 15 saǵattyq ushýdan jáne eki ret aýysyp minýden keiin Qostanaiǵa qondyq. Jylqylardyń jaǵdaiy jaqsy, qazir olardy krandardyń kómegimen júk kólikterine tiep jatyr. Eń qaýipti kezeń artta qaldy, biraq alda negizgi synaq kútip tur. Óitkeni aldyńǵy eki jyldaǵydai emes, bul joly biz Qostanaidan “Altyn dalaǵa” baramyz jáne jol 12 saǵatqa deiin sozylýy múmkin», – delingen dúisenbi kúni jariialanǵan habarlamada.
Baǵdarlama aiasynda alǵash ret Qazaqstanǵa tek aiǵyrlardan quralǵan top jetkizilgen.
Janýarlar Qostanaiǵa CASA ushaǵymen jetkizildi. Keiin áýe kemesi Berlinge qaita oralyp, taǵy tórt bieni alyp keledi.
Osylaisha, baǵdarlamanyń qazirgi kezeńi aiasynda Qazaqstanǵa jalpy segiz Prjevalskii jylqysyn jetkizý josparlanyp otyr.
