Úndistan azamaty Qazaqstanǵa bilim berý salasyndaǵy issaparmen kelip, esirtkige bailanysty qylmys úshin úsh jylǵa bas bostandyǵynan aiyryldy, dep habarlaidy Dalanews.kz.
Bul týraly jýrnalist Mihail Kozachkov jazdy. Shaikh Abdaluddin esimdi Úndistan azamaty byltyr qazan aiynda Fly Dubai áýe kompaniiasynyń reisimen Astanaga ushyp kelgen. Ol elordada bir táýlik aialdap, keiin Almatyǵa barýy tiis bolǵan. Inostrandyqtyń negizgi maqsaty Dýbaida ornalasqan britandyq De Montfort University filialyna qazaqstandyq stýdentterdi tartý edi.
Astanaǵa kelgen soń ol «Jumbaqtas» qonaqúiine ornalasady. Sol jerde, onyń aitýynsha, tósektiń janyndaǵy týmbochka ústinen ishinde aq untaq bar shaǵyn paket taýyp alǵan. Bul esirtki ekenin túsingen ol internetten qoldan jasalatyn shylym shegý quralyn qalai daiyndaý keregin qarap, birneshe minýttan keiin alǵashqy dozany qabyldaǵan.
Zat sheteldikke qatty unaǵan bolýy kerek, ol ony tastamai, Almatyǵa ózimen birge alyp ketýdi uiǵarǵan. Esirtkini ish kiimine jasyryp, al shylym shegýge arnalǵan quraldy sómkesine salyp, áýejaiǵa bet alǵan.
Alaida áýejaida aviatsiialyq qaýipsizdik qyzmetkerleri júktegi kúmándi qurylǵyny birden baiqap, ony tekserý aimaǵyna ótkizgen. Tekserý barysynda esirtkiniń bir bóligi onyń denesinde jasyrylǵany anyqtalǵan.
Osydan keiin sheteldik azamat ustalyp, qamaýǵa alyndy. Oǵan asa iri mólsherde, satý maqsatynsyz esirtkini zańsyz saqtaý jáne tasymaldaý baby boiynsha aiyp taǵyldy. Qazaqstan zańnamasyna sáikes, bul qylmys úshin 3 jyldan 7 jylǵa deiin bas bostandyǵynan aiyrý jazasy kózdelgen.
Sotta Shaikh Abdaluddin kinásin tolyq moiyndap, jasaǵan isine ókinish bildirip, bostandyǵynan aiyrmaityn jaza taǵaiyndaýdy suraǵan. Alaida sýdia Adilbek Baimahanov isten jeńildetetin mán-jai tappai, Úndistan azamatyn ortasha qaýipsizdik deńgeiindegi túzeý mekemesinde 3 jylǵa bas bostandyǵynan aiyrý týraly úkim shyǵardy.
