Qazaqstan men Túrkiia avtokólikpen halyqaralyq júk tasymaldaýdy jeńildetip, qazaqstandyq tasymaldaýshylarǵa Túrkiianyń teńiz porttarynan júk tiep, ony Qazaqstanǵa jetkizýge múmkindik beretin kelisimge keldi, dep habarlaidy dalanews.kz.
Bul týraly Antaliada ótken Qazaqstan-Túrkiia aralas avtomobil kóligi jónindegi komissiia otyrysynyń qorytyndysynda belgili boldy.
Taraptar elektrondy ruqsattardy berýde sandyq shekteý bolmaitynyn kelisti. Bul tasymaldaýshylarǵa qajettiligine qarai baǵyttardy ikemdi josparlap, júk tasymalyn jedel uiymdastyrýǵa múmkindik beredi.
Mańyzdy kelisimderdiń biri – qazaqstandyq avtotasymaldaýshylardyń Túrkiia teńiz porttarynan júk tiep, ony Qazaqstanǵa jetkizýine múmkindik berilýi.
Taraptar 2026 jyldan bastap mundai tranzittik júkterdi tasymaldaýǵa jyl saiyn bir-birine 3 myńnan ruqsat berýge kelisti.
Kólik ministrligi bul sheshim Qazaqstan men Túrkiia arasyndaǵy saýda-ekonomikalyq bailanystardy jáne kólik-logistikalyq yntymaqtastyqty damytýǵa múmkindik beretinin atap ótti.
Buǵan deiin Qazaqstan men Túrkiia tranzittik tasymaldarǵa qatysty ruqsat júiesin joiý jáne erkin tranzitke kóshý jóninde de ýaǵdalasqan bolatyn. Qazaqstandyq tasymaldaýshylarǵa Túrkiianyń teńiz porttarynda júk tieý jáne túsirý múmkindigi qarastyrylǵan.
Bul kelisim Transkaspii halyqaralyq kólik baǵyty men Qazaqstan-Túrkiia arasyndaǵy júk tasymalyn damytý turǵysynan da mańyzdy. 2025 jyly Qazaqstan men Túrkiia arasyndaǵy temirjol arqyly júk tasymaly 6,4 mln tonnaǵa jetip, bir jylda 35%-ǵa ósken.
