Resei valiýtasy aitarlyqtai nyǵaiyp jatqanyna qaramastan, Qazaqstanda rýblge degen suranys kúrt tómendegen. Rýbl taza satylymynyń teris mándegi úlesi Almaty men Astana qalalaryna tiesili, dep habarlaidy Dalanews.kz.
"Resei rýbliniń taza satylymynyń teris kólemi (iaǵni aqsha aiyrbas oryndarynda rýbldi satyp alǵannan góri ótkizý jaǵdaiy kóp) altynshy ai qatarynan tirkelýde.Máselen, eger 2024 jylǵy jeltoqsanda taza satylym kólemi minýs 4,4 mlrd teńgeni qurasa, aǵymdaǵy jyldyń qańtarynda bul kórsetkish minýs 9,5 mlrd teńgege jetken, al sáýir men mamyrda minýs 30,8 mlrd jáne minýs 35,7 mlrd teńgeni qurady", dep jazady Finprom.kz.
2025 jyly aqsha aiyrbas oryndarynda rýbldiń taza satylymyndaǵy teris mán alǵashqy bes ai boiynda tirkeldi. Jalpy, 2025 jyldyń qańtar-mamyr ailarynda reseilik rýbl saýdasynyń teris máni 107,4 mlrd teńgeni qurady. Bul - 2024 jáne 2023 jyldardaǵy uqsas kezeńderge qaraǵanda edáýir kóp (- 5,4 mlrd teńge jáne -9 mlrd teńge) kólem. Salystyrmaly túrde alsaq, 2022 jyldyń qańtar–mamyr ailarynda taza satylym kólemi oń mánge ie bolyp, 241,3 mlrd teńgege jetken.
Sonymen qatar, óńirlik bóliniste aǵymdaǵy jyldyń qańtar-mamyr ailarynda Resei rýbli boiynsha aqsha aiyrbas oryndarynyń saýda-sattyǵynda elimizdiń 20 óńiriniń 14-inde oń mán tirkeldi. Eń úlken kórsetkish - Qaraǵandy jáne Shyǵys Qazaqstan oblystarynda: ár óńirde 2,3 mlrd teńgeden. Odan keiin Aqmola (1,2 mlrd teńge), Soltústik Qazaqstan (1 mlrd teńge) jáne Mańǵystaý (1 mlrd teńge) oblystary tur. Al Qazaqstannyń alty óńirinde teris mánder tirkelgenin atai ketelik:
- Shymkentte: -40,8 mln teńgeden
- Astanada: -102,4 mlrd teńgege deiin.
- Almatyda: -15,5 mlrd teńge.
"Reseidiń 1 rýbliniń resmi aiyrbas baǵamy aǵymdaǵy jyldyń maýsym aiynda ortasha eseppen 6,54 teńgeni qurady, bul - 2023 jyldyń qańtarynan bergi eń joǵary kórsetkish (6,68 teńge). Mamyr aiymen salystyrǵanda rýbl baǵamy 3%- ǵa, al ótken jyldyń maýsymymen salystyrǵanda birden 26,3%-ǵa ósti. Osylaisha, baǵamnyń ósýi kezinde rýbldi ótkizý kóleminiń úzdiksiz ósýi, basqalarmen qatar qazaqstandyqtar tarapynan da qymbat rýblge degen qyzyǵýshylyqtyń joǵalǵanyn kórsetýi múmkin. 2025 jyldyń shilde aiynyń basynda 1 rýbl baǵamy 6,62 teńgeni qurady. 3 shildege qarai ol tek 0,3%-ǵa, 6,6 teńgege deiin tómendedi", - deidi sarapshylar.
Aita ketsek, 2025 jylǵy 1 sáýirdegi jaǵdai boiynsha Qazaqstanda Resei kapitalynyń qatysýymen 18,4 myń zańdy tulǵa jumys isteidi. Olardyń kóbisi rýblmen jumys isteidi.
