Jyldyń alǵashqy bes aiynyń qorytyndysy boiynsha Qazaqstannyń memlekettik biýdjetine túsken kiris kólemi jospardan asyp tústi. Qarjy ministrliginiń málimetinshe, qańtar-mamyr aralyǵynda biýdjetke 11,4 trillion teńgeden astam qarjy túsken. Bul byltyrǵynyń sáikes kezeńimen salystyrǵanda 16 paiyz kóp, dep habarlaidy dalanews.kz.
“QZ Economy. Taldaý” sarapshylary muny eldegi ekonomikalyq belsendiliktiń saqtalýymen jáne kásipkerlik qyzmettiń jandanýymen bailanystyrady.
“Respýblikalyq biýdjet kiristeri de jospardan joǵary oryndalǵan. Josparlanǵan 7,34 trillion teńgeniń ornyna qazynaǵa 7,41 trillion teńge túsken. Iaǵni, jospar 66,7 milliard teńgege artyǵymen oryndaldy. Al byltyrǵy bes aimen salystyrǵanda respýblikalyq biýdjet kirisi 1,48 trillion teńgege kóbeigen”, - deidi derekkóz
Jergilikti biýdjetterdiń de túsimi artqan. Jedel derekterge sáikes, olardyń kirisi 4 trillion teńgeden asyp, ótken jyldyń osy kezeńimen salystyrǵanda 95,1 milliard teńgege nemese 2,4 paiyzǵa ósken.
Respýblikalyq biýdjet kirisiniń ulǵaiýyna qosylǵan qun salyǵy (QQS), korporativtik tabys salyǵy (KTS), paidaly qazbalardy óndirýge salynatyn salyq jáne shiki munai eksportyna salynatyn kedendik baj túsimderiniń artýy yqpal etken.
Bul kórsetkishter el ekonomikasyndaǵy oń úrdisterdiń saqtalyp otyrǵanyn ańǵartady. Sonymen qatar álemdik naryqtaǵy qolaily jaǵdai men salyq júiesindegi ózgeristerdiń de áseri baiqalady.
“Jyldyń alǵashqy bes aiyndaǵy nátijelerdi turaqty úrdistiń qalyptasa bastaǵanynyń belgisi deýge bolady. Áleýmettik jelilerdegi túrli kúmándi boljamdarǵa qaramastan, ekonomikanyń negizgi kórsetkishteri oń dinamikany kórsetip otyr”, - dep atap ótti derekkóz.
Sáikesinshe, júrgizilip jatqan salyq reformasy óz tiimdiligin dáleldei bastaǵanyn baiqaýǵa bolady. Ekonomikalyq belsendiliktiń artýy biýdjet kirisiniń ósýine múmkindik berip, memlekettik qarjy júiesiniń turaqtylyǵyn qamtamasyz etip otyr.
