Qazaqstandyq tsirk artisteri Jasmina Alshynbaeva men Avelina Gýzei Reseidiń Saratov qalasynda ótken XI Halyqaralyq tsirk óneri festivali «Tsirk hanshaiymy – 2025»-te eń joǵary marapat — Altyn tájdiń iegeri atandy, – dep habarlaidy Dalanews.kz
2005 jyldan beri ótkizilip kele jatqan bul aitýly forým álemniń túkpir-túkpirinen tsirk sahnasynyń úzdik ókilderin jinap, tsirk óneriniń damýyna áielderdiń qosqan úlesin erekshe atap ótedi. Biyl Reseidiń eń kóne tsirki — aǵaiyndy Nikitinder atyndaǵy Saratov memlekettik tsirk arenasynda AQSh, Meksika, Qytai, Vetnam, Ispaniia jáne Qazaqstan sekildi 13 elden qatysýshylary óner kórsetti.
Qazaqstan atynan Qazaq memlekettik tsirkiniń artisteri – áigili tsirk áýletiniń ókili Jasmina Alshynbaeva men talantty áýe gimnastshysy Avelina Gýzei qatysty. Olar qoiýshy-rejisser Zarina Tapalovanyń jetekshiligimen alǵash ret «Áýe sferasy» dep atalatyn «saqinada juptasa óner kórsetý» janry boiynsha nómir usyndy.
Kúsh, sulýlyq jáne minsiz tehnikany ushtastyrǵan bul áserli qoiylym halyqaralyq qazylar alqasy men kórermenderdi tánti etip, ónerpazdar festivaldiń bas júldesin ielendi.
«Biz bul nómirdi birneshe ai boiy daiyndadyq, ár qimylymyzdy ábden ushtadyq. Bul óte jaýapty sát boldy: premera, jańa sahna, halyqaralyq qazylar. Biraq kúmbez astyna shyqqan sátte qobaljý shabytqa ainaldy. Bul bizdiń juldyzdy sátimiz boldy», - dedi Jasmina Alshynbaeva.
Qazaqstandyq gimnastshylardyń bul jeńisi – jekelegen jetistik emes, búkil otandyq tsirk óneri úshin zor tabys. Bul Qazaqstannyń kásibi deńgeiiniń jáne shyǵarmashylyq áleýetiniń álemdik arenada joǵary ekenin dáleldeitin úlken jetistik.
