2025 jyly naýryzda "Qazaqstandyq kommýnaldyq júieler" JShS (QKJ) kompaniialar toby AIX birjasyna teńge jáne AQSh dollary túrine alǵashqy obligatsiialaryn ornalastyrýdy josparlap otyr, dep habarlaidy Dalanews.kz.
"Qazaqstandyq kommýnaldyq júieler - bul elektr jáne jylý energetikasy sektorlarynda jumys isteitin integratsiialanǵan energetikalyq kompaniia. Top quramyna Qaraǵandy, ShQO, Mańǵystaý, Túrkistan oblystary men Shymkent qalasyndaǵy kásiporyndar kiredi. Tartylǵan qarajat infraqurylymdy jańǵyrtýǵa jáne jańartylatyn energiia kózderin (JEK) damytýǵa baǵyttalatyn bolady. Bul qadam QKJ-ǵa Qazaqstannyń "jasyl" energetika sektoryndaǵy pozitsiiany nyǵaitýǵa jáne salanyń turaqty damýyn qoldaýǵa múmkindik beredi. Bul baǵyttar Qazaqstannyń energetikalyq sektordy damytý salasyndaǵy memlekettik saiasatynyń basymdyqtaryna tolyqtai sai keledi", dep jazady Forbes.kz.
QKJ - qarjylyq turaqtylyqtyń, jumysyn ashyq júrgizýdiń jáne kásibi komandanyń arqasynda turaqty damýdy qamtamasyz etýde Qazaqstannyń energiiamen jabdyqtaýshy salasyndaǵy kóshbasshy kompaniialardyń biri. Kompaniia únemi halyqaralyq aýditten, sonyń ishinde Big4 súzgisinen ótedi. Turaqty ósim strategiiasyna súiene otyryp, QKJ infraqurylymdaryn belsendi túrde jańǵyrtyp, salany damytyp otyrady. 2024 jyldyń qazan aiynda Fitch Ratings QKJ-ǵa "BB -" uzaq merzimdi kredittik reitingin berdi. Boljam – Turaqty.
Agenttiktiń esebine sáikes, kompaniianyń kúshti tustary mynalardy qamtidy:
- Qazaqstannyń energiiamen jabdyqtaý salasyndaǵy turaqty naryqtyq ustanymy;
- joǵary ótimdilik jáne qarjylyq tártip;
- elektr energiiasyn óndirý, taratý jáne jetkizýdegi tiimdi integratsiia.
QKJ qarjylyq kórsetkishteri damýdyń turaqtylyǵyn rastaidy: qaryz koeffitsenti/EBITDA - 0,8, al kiristiń ortasha jyldyq ósimi jáne EBITDA 15%-dy quraidy. Nesielik reitingti ala otyryp, QKJ institýtsionaldyq investorlarǵa kompaniianyń obligatsiialaryn satyp alý múmkindigin bere otyryp, AIX birjasyna shyǵyp otyr.
Obligatsiialardy josparly ornalastyrý 2025 jylǵy naýryzdyń birinshi onkúndigine josparlanǵan. Obligatsiialardy shyǵarýdy uiymdastyrý jáne anderraiteringti Qazaqstannyń jetekshi investitsiialyq kompaniialarynyń biri — BCC Invest júzege asyrady.
Buǵan deiin "Samuryq-Energo" Shúlbi men Óskemen GES-terin óz balansynan shyǵarǵanyn habarlaǵanbyz. Bul týraly derek KASE-de paida boldy. Nysandardy kim, qansha aqshaǵa satyp alǵany, ázirge belgisiz.
