Qazaq Expert Club-tyń bilim berý salasyndaǵy sarapshysy Jazira Asanovanyń pikirinshe, Qazaqstandaǵy bilim berý teńsizdigi týraly qalyptasqan túsinik búginde ózektiligin joǵalta bastaǵan, dep habarlaidy dalanews.kz.
Sarapshy PISA for Schools zertteýiniń keiingi úsh jyldaǵy nátijelerine nazar aýdardy. Onyń málimetinshe, aýyl oqýshylary matematika páni boiynsha qaladaǵy qurdastarynan joǵary nátije kórsetip keledi. Alaida oqý saýattylyǵy men jaratylystaný ǵylymdary boiynsha qala mektepteriniń artyqshylyǵy saqtalǵan.
Jazira Asanova muny bilim sapasyndaǵy másele mektepterdiń materialdyq jaǵdaiyna nemese oqytý deńgeiine ǵana bailanysty emes ekenin kórsetetin úrdis dep baǵalaidy.
Onyń aitýynsha, keiingi jyldary aýyl mektepterin damytýǵa baǵyttalǵan jobalar tabysty júzege asyp jatyr. Máselen, Katonqaraǵai aýdanyndaǵy Órel tirek mektebi Ortalyq Aziia men TMD aýmaǵyndaǵy alǵashqy Google Reference School mártebesine ie bolǵan.
Sarapshynyń pikirinshe, qazir negizgi alshaqtyq mektepterdiń arasynda emes, bilim berý ortasynda baiqalady.
"Matematikadan jaqsy nátije kórsetýge mektep yqpal ete alady. Al oqý saýattylyǵy tek synyptaǵy bilimmen shektelmeidi. Oǵan otbasy, kitapqa qoljetimdilik, mádeni tájiribe, tálimgerler men qosymsha bilim berý múmkindikteri áser etedi", – deidi ol.
Jazira Asanova aýyl mektepterin internetpen qamtamasyz etý jáne jasandy intellekt quraldaryn engizý mańyzdy qadam ekenin atap ótti. Degenmen tsifrlyq teńdik kóbine mektep qabyrǵasynan shyqqan soń aiaqtalady.
Sarapshynyń sózinshe, aýyldyq jerlerde balalar úshin qosymsha bilim berý múmkindigi shekteýli. Al qaladaǵy oqýshylar sabaqtan keiin túrli úiirmelerge, kýrstarǵa jáne repetitorlarǵa qatysa alady. Ol bilim berý teńsizdigi joǵary oqý ornyna túsý kezeńinde de baiqalatynyn aitty. Sondyqtan memlekettik granttar aýyl jastary úshin joǵary bilim alýdyń mańyzdy tetigi bolyp otyr.
Jazira Asanova bilim berý salasyndaǵy alshaqtyqty azaitý úshin úsh baǵytqa basymdyq berý qajet degen pikirde. Olar - muǵalimderdiń kásibi bailanysyn kúsheitý, oqýshylar úshin sabaqtan tys múmkindikterdi keńeitý jáne mekteptiń jergilikti qaýymdastyqtyń damý ortalyǵyna ainalýyna jaǵdai jasaý.
