Kaspi banktiń aksıoneri, Qazaqstannyń eń qaltaly azamatynyń biri Vácheslav Kım Jusan bankin satyp alýǵa nıetti. Bul týraly Manualanomics arnasy óz derekkózine silteme jasaı otyryp habarlaıdy. Oǵan sáıkes, Kım Jusan Bank-tiń qazirgi ıesi, Ahmetjan Esimovtiń eks-kúıeýbalasy Ǵalymjan Esenovke tıesili búkil aksıalar paketin (99,74%) ıelenbek, dep jazady Dalanews.kz.
Jusan Bank-tiń ıesi aýysatyny jáne damý strategıasynyń ózgeretini buǵan deıin de aıtylyp júrgen. Eger retteýshi organdar kelisim berse, jaqyn arada banktiń jańa menshik ıesi Vácheslav Kım bolmaq. Qazir Kaspi aktıvter kólemi boıynsha elimizde ekinshi orynda tur (8,2 trln teńge), Jusan – altynshy (3,3 trln teńge) orynda.
Jusan Bank 2017–2020 jyldary memleketten 1 trln teńge kómek alǵan. Ázirge, bul qaryzdy kim qaıtaratyny belgisiz.
Bloomberg-tiń paıymdaýynsha, 6,7 mlrd dollary bar Vácheslav Kım nashar nesıeler máselesin Esenovke qaraǵanda tıimdirek sheshe alady. Ótken jyly Jusan 100 mlrd teńge kólemindegi memlekettik kómekti qaıtarǵan bolatyn.
"Banktiń jańa strategıasy kásiporyndardy nesıelendirýge jáne kepildi zaımdarǵa, sonyń ishinde ıpotekalyq kredıtterge baǵyttalýy múmkin, osylaısha ol Kaspi-men tikeleı básekege túspeıdi", - deıdi osy tusta Bloomberg.
Buǵan deıin saıtymyzda "2024 jyly qazaqstandyq tórt banktiń aksıonerleri quramynda aýys-túıis boldy" degen maqala jarıalanǵan bolatyn.
