Aldaǵy alty ai ishinde Qazaqstanda ipotekalyq nesielerdiń quny tómendeýi múmkin. Shilde aiynan bastap ipoteka boiynsha jyldyq paiyzdyq mólsherlemeniń eń joǵary shegi 20% deńgeiinde belgilenýi josparlanyp otyr, dep habarlaidy Dalanews.kz 31 arnaǵa sileteme jasap.
Qarjy naryǵyn retteý jáne damytý agenttiginiń pikirinshe, bul qadam ipotekany halyq úshin qoljetimdi etýge baǵyttalǵan.
Alaida ekonomister bastamany saqtyqpen baǵalap otyr. Olardyń aitýynsha, mólsherlemeni qatań shekteý kerisinshe ipotekalyq nesie alýdy qiyndatýy múmkin. Sebebi qazirgi jaǵdaida infliatsiia joǵary, al bazalyq mólsherleme 18% deńgeiinde qalyp otyr. Mundai jaǵdaida bankter ipoteka paiyzyn 22%-dan tómen túsire almaidy, al ákimshilik shekteý ipotekalyq naryqtyń 30–40% qysqarýyna ákelýi yqtimal.
Ekonomist Jeńis Sháriptiń aitýynsha, ipoteka tolyq toqtap qalmaidy, biraq ony naqty 25%-dan 20%-ǵa deiin túsirý úshin bazalyq mólsherlemeni keminde 2%-ǵa tómendetý qajet.
Al ekonomist Baýyrjan Ysqaq ipoteka arzandasa, baspanaǵa suranys artady, biraq úi baǵasy tómendemeidi, deidi. Onyń sózinshe, 20 mln teńge kólemindegi ipotekany 20 jyl merzimge 25% mólsherlememen rásimdegende ai saiynǵy tólem 420–450 myń teńgeni qurasa, paiyzdyq mólsherleme 20%-ǵa tómendegen jaǵdaida bul soma 320–340 myń teńgege deiin azaiady. Bul otbasylyq biýdjetke túsetin salmaqty aitarlyqtai jeńildetedi.
Sonymen birge sarapshylar ipotekanyń arzandaýy turǵyn úi baǵasynyń 15%-ǵa deiin qymbattaýyna sebep bolýy múmkin ekenin eskertedi. Bilik bul shekteýdi byltyr engizýdi josparlaǵanymen, bazalyq mólsherlemeniń ósýine bailanysty birneshe ret keiinge qaldyrǵan.
