Qazaqstan Respýblikasynyń Ulttyq qorynan bólingen qarajattyń jumsalýyn monitoringteý jónindegi komissiia jumysyn qaita bastady, dep habarlaidy Dalanews.kz.
Qazaqstanda Ulttyq qordan bólingen qarajattyń jumsalýyna monitoring júrgizý jónindegi Komissiia jumysyn qaita bastady. 2014 jyly qurylǵannan bastap ol QR Ulttyq Bankiniń qaramaǵynda jumys istedi. 2020 jyldan bastap Komissiianyń jumys organy Joǵary aýditorlyq palata boldy.
Qazirgi ýaqytta Memleket basshysynyń tapsyrmalaryn oryndaý maqsatynda Komissiianyń qyzmeti jańartylǵan formatta jáne jańa qurammen jalǵasady. Uzaq úzilisten keiin biyl 21 aqpanda Álihan Smaiylovtyń tóraǵalyǵymen Joǵary aýditorlyq palatada Komissiianyń otyrysy ótti.
Jiynǵa Prezident Ákimshiliginiń, Ulttyq Banktiń, Bas prokýratýranyń, Sybailas jemqorlyqqa qarsy is-qimyl agenttiginiń, Qarjy monitoringi agenttiginiń, Ulttyq qaýipsizdik komitetiniń, Qarjy jáne Ulttyq ekonomika ministrlikteriniń laýazymdy tulǵalary, Parlament Májilisi men Senatynyń depýtattary jáne t.b. qatysty.
Memleket basshysy Qasym-Jomart Toqaev ótken jyldyń qyrkúiek aiyndaǵy Qazaqstan halqyna Joldaýynda Ulttyq qordyń erekshe róli men mańyzdylyǵyn taǵy da atap ótti.
«Qordyń qarajatyn, eń aldymen, memleket múddesi úshin, iaǵni elimizdiń strategiialyq maqsattaryn júzege asyrý úshin paidalaný qajet. Ulttyq qor sheteldik qarjy institýttaryna qyzmet etpeýi kerek. Ulttyq qor – uzaq merzimge arnalǵan makroekonomikalyq turaqtylyqty qamtamasyz etetin asa mańyzdy qural. Sondyqtan ony tiimdi basqarý qajet», — dedi Prezident.
Otyrys barysynda Komissiia tóraǵasy Álihan Smaiylov Ulttyq qor qarajatyn jumsaýdyń zańdylyǵy men tiimdiligine monitoring júrgizý tásilderi ózektendiriletinin atap ótti.
«Komissiianyń jumysyn qaita bastaýymyz kerek. Vedomstvoaralyq is-qimyl men Ulttyq qor qarajatynyń tiimdi jáne maqsatty paidalanylýyn baqylaý úshin jaýapkershilik aimaqtaryn naqty aiqyndaý qajet», — dedi Álihan Smaiylov.
«Ulttyq qor – balalarǵa» baǵdarlamasyna bailanysty da jurtshylyqtyń Ulttyq qordy utymdy paidalanýǵa nazary kúsheiýde.
«Ulttyq qordan alynatyn transfertterden ekonomikalyq qaitarym bolýy qajet. Ulttyq qor memlekettik mańyzdy emes mindetterge paidalanylmaýy tiis. Memleket basshysy osyndai mindet qoidy», — dep atap ótti Joǵary aýditorlyq palata tóraǵasy.
Álihan Smaiylov aldaǵy kezeńge arnalǵan mindetterdi atap ótti:
- Ulttyq qordan ekonomikany jeńildetilgen sharttarmen qoldaýǵa bólingen qarajatqa tekserý júrgizý;
- Ulttyq qor qarajatyn neǵurlym basym baǵyttarǵa qaita bólý nemese olardy qaitarý jóninde usynystar berý.
Otyrys barysynda komissiia quramyn jańartý, onyń qyzmetin jańa formatta reglamentteý, qorytyndylardyń sapasyn arttyrý jáne t. b. máseleler talqylandy.
QR Ulttyq qorynan bólingen qarajattyń jumsalýyna monitoring júrgizý jónindegi komissiia konsýltativtik-keńesshi organ bolyp tabylady. Ol QR Prezidentiniń Ókimimen 2014 jyly qurylǵan.
