قازاقستان رەسپۋبليكاسىنىڭ ۇلتتىق قورىنان بولىنگەن قاراجاتتىڭ جۇمسالۋىن مونيتورينگتەۋ جونىندەگى كوميسسيا جۇمىسىن قايتا باستادى، دەپ حابارلايدى Dalanews.kz.
قازاقستاندا ۇلتتىق قوردان بولىنگەن قاراجاتتىڭ جۇمسالۋىنا مونيتورينگ جۇرگىزۋ جونىندەگى كوميسسيا جۇمىسىن قايتا باستادى. 2014 جىلى قۇرىلعاننان باستاپ ول ق ر ۇلتتىق بانكىنىڭ قاراماعىندا جۇمىس ىستەدى. 2020 جىلدان باستاپ كوميسسيانىڭ جۇمىس ورگانى جوعارى اۋديتورلىق پالاتا بولدى.
قازىرگى ۋاقىتتا مەملەكەت باسشىسىنىڭ تاپسىرمالارىن ورىنداۋ ماقساتىندا كوميسسيانىڭ قىزمەتى جاڭارتىلعان فورماتتا جانە جاڭا قۇراممەن جالعاسادى. ۇزاق ۇزىلىستەن كەيىن بيىل 21 اقپاندا ءاليحان سمايىلوۆتىڭ توراعالىعىمەن جوعارى اۋديتورلىق پالاتادا كوميسسيانىڭ وتىرىسى ءوتتى.
جيىنعا پرەزيدەنت اكىمشىلىگىنىڭ، ۇلتتىق بانكتىڭ، باس پروكۋراتۋرانىڭ، سىبايلاس جەمقورلىققا قارسى ءىس-قيمىل اگەنتتىگىنىڭ، قارجى مونيتورينگى اگەنتتىگىنىڭ، ۇلتتىق قاۋىپسىزدىك كوميتەتىنىڭ، قارجى جانە ۇلتتىق ەكونوميكا مينيسترلىكتەرىنىڭ لاۋازىمدى تۇلعالارى، پارلامەنت ءماجىلىسى مەن سەناتىنىڭ دەپۋتاتتارى جانە ت.ب. قاتىستى.
مەملەكەت باسشىسى قاسىم-جومارت توقايەۆ وتكەن جىلدىڭ قىركۇيەك ايىنداعى قازاقستان حالقىنا جولداۋىندا ۇلتتىق قوردىڭ ەرەكشە ءرولى مەن ماڭىزدىلىعىن تاعى دا اتاپ ءوتتى.
«قوردىڭ قاراجاتىن، ەڭ الدىمەن، مەملەكەت مۇددەسى ءۇشىن، ياعني ەلىمىزدىڭ ستراتەگيالىق ماقساتتارىن جۇزەگە اسىرۋ ءۇشىن پايدالانۋ قاجەت. ۇلتتىق قور شەتەلدىك قارجى ينستيتۋتتارىنا قىزمەت ەتپەۋى كەرەك. ۇلتتىق قور – ۇزاق مەرزىمگە ارنالعان ماكروەكونوميكالىق تۇراقتىلىقتى قامتاماسىز ەتەتىن اسا ماڭىزدى قۇرال. سوندىقتان ونى ءتيىمدى باسقارۋ قاجەت»، — دەدى پرەزيدەنت.
وتىرىس بارىسىندا كوميسسيا ءتوراعاسى ءاليحان سمايىلوۆ ۇلتتىق قور قاراجاتىن جۇمساۋدىڭ زاڭدىلىعى مەن تيىمدىلىگىنە مونيتورينگ جۇرگىزۋ تاسىلدەرى وزەكتەندىرىلەتىنىن اتاپ ءوتتى.
«كوميسسيانىڭ جۇمىسىن قايتا باستاۋىمىز كەرەك. ۆەدومستۆوارالىق ءىس-قيمىل مەن ۇلتتىق قور قاراجاتىنىڭ ءتيىمدى جانە ماقساتتى پايدالانىلۋىن باقىلاۋ ءۇشىن جاۋاپكەرشىلىك ايماقتارىن ناقتى ايقىنداۋ قاجەت»، — دەدى ءاليحان سمايىلوۆ.
«ۇلتتىق قور – بالالارعا» باعدارلاماسىنا بايلانىستى دا جۇرتشىلىقتىڭ ۇلتتىق قوردى ۇتىمدى پايدالانۋعا نازارى كۇشەيۋدە.
«ۇلتتىق قوردان الىناتىن ترانسفەرتتەردەن ەكونوميكالىق قايتارىم بولۋى قاجەت. ۇلتتىق قور مەملەكەتتىك ماڭىزدى ەمەس مىندەتتەرگە پايدالانىلماۋى ءتيىس. مەملەكەت باسشىسى وسىنداي مىندەت قويدى»، — دەپ اتاپ ءوتتى جوعارى اۋديتورلىق پالاتا ءتوراعاسى.
ءاليحان سمايىلوۆ الداعى كەزەڭگە ارنالعان مىندەتتەردى اتاپ ءوتتى:
- ۇلتتىق قوردان ەكونوميكانى جەڭىلدەتىلگەن شارتتارمەن قولداۋعا بولىنگەن قاراجاتقا تەكسەرۋ جۇرگىزۋ؛
- ۇلتتىق قور قاراجاتىن نەعۇرلىم باسىم باعىتتارعا قايتا ءبولۋ نەمەسە ولاردى قايتارۋ جونىندە ۇسىنىستار بەرۋ.
وتىرىس بارىسىندا كوميسسيا قۇرامىن جاڭارتۋ، ونىڭ قىزمەتىن جاڭا فورماتتا رەگلامەنتتەۋ، قورىتىندىلاردىڭ ساپاسىن ارتتىرۋ جانە ت. ب. ماسەلەلەر تالقىلاندى.
ق ر ۇلتتىق قورىنان بولىنگەن قاراجاتتىڭ جۇمسالۋىنا مونيتورينگ جۇرگىزۋ جونىندەگى كوميسسيا كونسۋلتاتيۆتىك-كەڭەسشى ورگان بولىپ تابىلادى. ول ق ر پرەزيدەنتىنىڭ وكىمىمەن 2014 جىلى قۇرىلعان.
