Qoǵamda qyzý talqylanǵan suraqtyń tushymdy jaýabyn Qasym Amanjoldyń Azattyqtaǵy «Erkin sóz» baǵdarlamasynda aqyn Almas Ahmetbek pen saiasattanýshy Rasýl Jumaly anyq jetkizdi. Rasýl Jumaly shettegi 5 million qazaq úshin qazaqqa, kóshi-qonǵa shynaiy jany ashityn azamattardyń Parlamentte bolý kerektigin, ondai kóshi-qon máselesin sheshetin adam shetten kelgen-kelmegeni mańyzdy emes ekenin, qaida týylsa da qazaqqa shynaiy jany ashityn azamat bolýy kerektigin, kóshi-qon máselesi – «oralmandardyń» ǵana máselesi emes ekendigin, búkil qazaqqa ortaq másele ekenin aitty. Sonymen birge, 24 jyldan bergi kelgen qandastar arasynda ulttyq máselelerdi kóterip júrgen, qarym- qabileti bar, depýtat bolýǵa laiyqty azamattardyń bar ekenin, olar Parlamentke baryp jatsa, tek qana kóshi-qon máselesin kótermeitindigin, ulttyq máselelerdiń bárinde únsiz qalmaityndyǵyn jetkizdi. Al, Almas Ahmetbek myrza «qandastardan depýtat shyqsyn degen usynystar eshqandai arnaiy jeńildik suraý emestigin, partiialar tiziminen sailaýǵa túsýge múmkindikter berilse» degen tilektermen partiia basshylaryna eskertý ekenin aityp ótti.
JSDP atynan úmitker bolyp otyrǵan Rahym Aiyp aǵamyz ǵana emes, ulttyń naǵyz janashyrlary Ermurat Bapi, Záýresh Battalova, Qurmanǵazy Rahmetov siiaqty azamattar Parlamentke ótip jatsa, bir úlken jeńispen birdei edi. Biraq, bul quramdy Parlamentke ótkize qoiý óte qiyn.
Endigi úmit «Aq jolda» edi. Úmitker Qaiyrbek Kemeńgerdiń (basty bettegi sýrette)óz sózi boiynsha aitqandai:
«Mereiim ósip mereiińmenen,
Atajurt saǵan keleiin dep em,
Bárin de sosyn kóreiin dep em,
Qazaqstanda týmasam daǵy,
Qazaqstanda óleiin dep em», – dep kelip, qazaqtyń ǵylymy men oqý salasynda óz úlesin qosyp júrgen, búgingi qazaq bolmysyna Alash ustany turǵysynan qaraityn, qaida júrse de ult pen Táýelsizdik muratyn biik qoiatyn azat eldiń azat azamaty Parlamentke baryp, Qazaq Eliniń erteńi úshin saiasi iske aralasyp, ulttyń sózin sóilemeske ne? Mundai ustanym men joldaǵy azamattar tek Qaiyrbek Kemeńger ǵana emes. El erteńine eńbek etýge qabileti jetetin túrli salanyń bilikti mamany retinde tanylǵan qandastarymyz bar. Biraq, olardyń bári eshbir partiia úmitkerleriniń ishinde bolmady. Álemdegi 17 million qazaqtyń biri retinde, Otanyn ańsap jetken azamattyń birine el saiasatyna aralasýǵa múmkindik bergen «Aq jol» partiiasyna raqmetimdi aityp, Qaiyrbek Kemeńger myrzanyń úmitker ǵana bolyp qalmai, Parlamenttiń jańa quramyndaǵy belsendi depýtattyń biri bolýyna tilektestigimdi bildiremin.
«Aq jol» partiiasynda ulttyq turǵyda oilap, ulttyq máselelerdi kóterip júrgen azamattar az emestigin osyǵan deiin de aitqan edim. Endi partiia jetekshilerine aitar ótinishim men eskertýim de bar. Sailaýda daýys jinap, Parlamenttiń jańa quramynan on oryn buiyrsa da, tipti bes-aq oryn buiyryp jatsa da, onyń 3 orny «Aq joldyń» atynan shyǵyp, qalyń qazaqtyń yqylasyna bólenip júrgen Qazbek Isa men jasta bolsa, ulttyń júgin kóterýge daiyn Maqsat Jaqaý, «Jan emes maǵan keregi, kók týdyń jelbiregeni» degen azamattyń biri Qaiyrbek Kemeńger syndy azamattarǵa berilmese, «Aq joldyń» Alashshyldyǵy men qazaqshyldyǵyna kúmán keltirýge týra keledi. «Aq jol» – kásipkerlerdiń ǵana quqyǵyn qorǵamai, aibyndy Alashty tý etip, bar qazaqtyń quqyn qorǵaýy kerek.
Turdybek Qurmethan
