Ishki ister ministrliginiń baspasóz qyzmetiniń habarlaýynsha, Qazaqstanda esirtki biznesine qarsy júrgizilgen kúres nátijesinde tórt aidyń ishinde 20 uiymdasqan qylmystyq toptyń (UQT) joly kesildi, dep habarlaidy Dalanews.kz.
“Tórt aida 3 myńǵa jýyq esirtkige qatysty quqyqbuzýshylyq anyqtaldy, onyń ishinde 828 derek – esirtkini satý faktisi. Jalpy kólemi shamamen 3,5 tonna esirtki tárkilendi. Onyń 259 kelisi sintetikalyq esirtki, 2 tonnaǵa jýyǵy marihýana, al 303 kelisi gashish. 83 esirtki zerthanasynyń áreketine tosqaýyl qoiyldy. Sonymen qatar, 6 tonnaǵa jýyq prekýrsor (esirtki óndirisine paidalanylatyn himiialyq zattar) tárkilendi. 20 uiymdasqan qylmystyq top joiyldy. Zańsyz kontent taratyp kelgen 11 myńnan astam sait buǵattalyp, 1 milliard teńgeden astam qarajat saqtalǵan 12 myń bank kartasy men shoty buǵattaldy. 1783 adam ustalyp, olardyń 669-y qamaýǵa alyndy”, — dedi QR IIM Esirtki qylmysyna qarsy is-qimyl komiteti tóraǵasynyń mindetin atqarýshy Daniiar Meirhan.
Onyń aitýynsha, sáýir aiynda birneshe sátti operatsiia júrgizilgen.
“Qosshy qalasynda Aqmola oblysynyń týmasy ustaldy. Kóligin tintý kezinde odan 6,5 keli a-PVP sintetikalyq esirtkisi tabyldy. Keiingi jedel sharalar barysynda onyń sybailastary – Soltústik Qazaqstan oblysynyń turǵyndary qolǵa túsip, olardan taǵy 1 keli “sintetika” alyndy”, — dep habarlady IIM.
Sondai-aq Astana qalasynda Aqtóbe turǵyny ustalyp, odan 2,5 keli sintetikalyq esirtki tárkilengen.
“Barlyq kúdikti ýaqytsha ustaý izoliatoryna qamaldy. Bul baǵyttaǵy jumystar jalǵasýda”, — dedi Meirhan.
