Qazaqstanda salyq esebin ýaqtyly tapsyrmaǵany úshin aiyppul salý tájiribesinen bas tartý josparlanyp otyr. Bul týraly salyqtyq ákimshilendirýdi jeńildetý jónindegi aldaǵy sharalar jaiynda aita otyryp, qarjy ministri Mádi Takiev málimdedi, dep habarlaidy Dalanews.kz.
Úkimet otyrysy barysynda ministr salyq deklaratsiiasy belgilengen merzimde tapsyrylmaǵan jaǵdaida, ol nóldik kórsetkishtermen tapsyryldy dep esepteletinin atap ótti. Sonymen qatar salyq tóleýshiniń qosymsha eseptilik tapsyryp, derekterdi durys naqtylaý quqyǵy saqtalady.
«Formalar azaiady, salyq eseptiligi de qysqarady. Biz salyq eseptiligin júieli túrde ońtailandyryp kelemiz. Salyq eseptiligi nysandarynyń sany jyl saiyn azaiyp jatyr. Mysaly, 2009 jyldan beri 70-ten 28-ge deiin qysqardy, iaǵni 60 paiyzǵa azaidy. (…) Eger deklaratsiia tapsyrylmasa, ol nóldik kórsetkishtermen tapsyryldy dep esepteledi, bul rette qosymsha eseptilik tapsyryp, derekterdi naqtylaý quqyǵy saqtalady», - dedi Mádi Takiev.
Qosymsha jańashyldyqtar 2026 jyldyń 1 qańtarynan bastap kúshine enedi. Mindettemeleriniń somasy 1 mln teńgeden aspaityn salyq tóleýshiler úshin múlik, kólik jáne jer salyqtary boiynsha aǵymdaǵy tólemderdiń toqsan saiynǵy esepteýleri alynyp tastalady.
Onyń ornyna kásipkerler:
– jyl qorytyndysy boiynsha bir ǵana deklaratsiia tapsyrady;
– salyqtardy jyl sońynda tóleidi, toqsan saiynǵy eseptilik bolmaidy.
Salyq qaryzyn óndirýdiń jańa tártibi
Ministr sondai-aq salyq bereshegin májbúrlep óndirý tásilderi qaita qaralatynyn aitty. Maqsat – sharalardyń shamadan tys bolmaýyn qamtamasyz etý jáne az somalar úshin mikro jáne shaǵyn bizneske qysym kórsetpeý.
Negizgi ózgeris – áreket etý bastalatyn shekterdiń ulǵaiýy. Endi bereshek bolǵan jaǵdaida:
– 87 myń teńgege deiin (20 AEK) – tek habarlama jiberiledi, ósimpul esepteledi, ózge sharalar qoldanylmaidy;
– 87 myńnan 195 myń teńgege deiin (20–45 AEK) – eskertý joldanady; qaryz ótelmegen jaǵdaida shyǵys operatsiialary bereshek somasy sheginde toqtatylady, keiin inkassalyq ókimder qoiylýy múmkin;
– 195 myń teńgeden joǵary (45 AEK) – qatań sharalar qoldanylady, onyń ishinde múlikti túgendeý jáne satý, sondai-aq debitorlar esebinen óndirip alý kózdelgen.
