AQSh-tyń Azamattyq jáne immigratsiia qyzmeti (USCIS) immigratsiialyq saiasatqa ózgerister engizilgenin málimdedi. Jańa talaptarǵa sáikes, endi ýaqytsha vizamen júrgen shetel azamattary AQSh aýmaǵynan shyqpai-aq grin-karta rásimdei almaidy, dep habarlaidy dalanews.kz.
Jańartylǵan erejeler buryn qoldanylyp kelgen keibir jeńildikterdi joiady. Buǵan deiin ýaqytsha vizamen kelgen azamattar belgili bir jaǵdaida elden shyqpai-aq turaqty turýǵa ruqsat (grin-karta) alýǵa ótinish bere alatyn. Endi mundai úderis tek konsýldyq rásimdeý arqyly júzege asady. Iaǵni, ótinish ieleri AQSh aýmaǵynan shyǵyp, qujattaryn óz elindegi nemese basqa memlekettegi AQSh konsýldyǵy arqyly rásimdeýi tiis.
USCIS ókilderiniń aitýynsha, ýaqytsha vizalar qysqa merzimdi saparlarǵa arnalǵan jáne olardy immigratsiiaǵa alǵashqy qadam retinde paidalanýǵa bolmaidy.
Sondai-aq immigratsiialyq ofitserlerge el ishinde mártebeni ózgertýge qatysty ár ótinishti jeke qarastyrý tapsyryldy. Mundai ótinishter tek erekshe jaǵdailarda ǵana maquldanady.
Vedomstvonyń málimetinshe, bosatylǵan resýrstar endi basqa basym gýmanitarlyq isterdi qaraýǵa baǵyttalady. Atap aitqanda, adam saýdasy men zorlyq-zombylyq qurbandaryna arnalǵan vizalardy rásimdeý, sondai-aq sońǵy jyldary kezegi kóbeiip ketken azamattyq alý (natýralizatsiia) ótinishterin jedel qaraý jumystary kúsheitiledi.
