Ánshi Tamara Asar áleýmettik jelidegi paraqshasynda Quryltaidyń jańa depýtattaryn quttyqtap, olarǵa birqatar máselege nazar aýdarýdy surady, dep habarlaidy dalanews.kz.
Óner iesi depýtattardyń halyqtyń áleýmettik jaǵdaiyn jaqsartýǵa baǵyttalǵan sapaly zańdar qabyldaýyna tilektestik bildirdi. Sondai-aq 145 depýtattyń bergen antyna berik bolyp, el igiligi úshin eńbek etýin tiledi.
"Ardaqty aǵaiyn! Quryltaidyń sý jańa depýtattary qutty bolsyn! Halyqtyń áleýmettik ál-aýqatyn jóndeitin zańdar shyǵaryp, qoi ústinde boztorǵai jumyrtqalaityn zaman bolsyn! Laiym 145 depýtat búgingi bergen anttaryna berik bolyp, óz erik-jigerlerimen, qajyr-qairattaryn qanshama muqtaj jandardyń saýabyn alatyn sapaly jumys jasaýlaryna jazsyn", – dep jazdy ánshi.
Tamara Asar elde áli de sheshimin kútip turǵan másele kóp ekenin atap ótti. Sonyń ishinde ol memlekettik portaldaǵy protezdik-ortopediialyq áleýmettik qyzmetterge ózgerister men tolyqtyrýlar qajet ekenin aitty.
"Qazaqstanda memlekettik portaldaǵy protezdik-ortopediialyq áleýmettik qyzmetterge tolyqtyrýlar jáne búgingi kúnge sai jańasha túzetýler kerek. Osy máselemen saýaty tereń, sol salanyń búge-shúgesin jaqsy biletin, tájiribesi mol mamandar, iaǵni memlekettik deńgeide Quryltaidyń minbesinde depýtattardyń ainalysýyn ótinemin", – dedi Tamara Asar.
Ánshi bul máseleniń Quryltai deńgeiinde kóterilip, bilikti mamandardyń qatysýymen jan-jaqty qarastyrylǵanyn qalaitynyn jetkizdi.
