Birikken Arab Ámirlikterinde qaza tapqan Qazaqstan azamattary Aqjan jáne Juldyz Bohanovalardyń denesi elge jóneltildi. Bul týraly QR Syrtqy ister ministrliginiń resmi ókili Janbolat Úsenov málimdedi, dep habarlaidy dalanews.kz.
Marqumdardyń denesin otanyna qaitarý jumystaryn Qazaqstannyń Dýbaidaǵy Bas konsýldyǵy uiymdastyrǵan.
"Qyzdardyń qazasyna bailanysty tergeý amaldaryn BAÁ-niń quqyq qorǵaý organdary jalǵastyryp jatyr. Qazaqstandyq diplomattar prokýratýramen jáne ámirliktiń ózge de quzyrly organdarymen turaqty bailanysta. Olar marqumdardyń otbasyna qajetti qoldaý kórsetýdi jalǵastyrady. Syrtqy ister ministrligi qaza tapqandardyń týǵan-týystary men jaqyndaryna taǵy da qaiǵyryp kóńil aitady", - delingen resmi habarlamada.
Shardja qalasynda apaly-sińlili Bohanovalardyń qaza tapqany týraly aqparat 25 tamyzda belgili boldy. Osyǵan deiin Syrtqy ister ministrligi Qazaqstannyń Dýbaidaǵy Bas konsýldyǵy qujattardy rásimdeýge kómektesip, oqiǵanyń mán-jaiyn anyqtaý úshin BAÁ-niń tiisti organdarymen birlesip jumys istep jatqanyn habarlaǵan.
