Ulybritaniialyq hirýrgter álemde alǵash ret jasandy intellektini naqty ýaqyt rejiminde qoldana otyryp, naýqastyń miyndaǵy isikti sátti alyp tastady. Bul týraly BBC málimdedi, dep habarlaidy dalanews.kz.
Bedfordshir turǵyny, eki balanyń ákesi Ris Hibbertke operatsiia London ýniversitettik kolledjiniń aýrýhanasynda jasalǵan. Dárigerlerdiń aitýynsha, hirýrgiialyq aralasý der kezinde júrgizilmegende naýqas kórý qabiletinen aiyrylýy múmkin edi.
Operatsiia kezinde jasandy intellekt júiesi beinejazbany naqty ýaqyt rejiminde saralap, hirýrgterge midaǵy kózge kórinbeitin mańyzdy qan tamyrlary men júikelerdi zaqymdap almaýǵa kómektesken. Sonyń arqasynda mamandar isiktiń barynsha kóp bóligin qaýipsiz alyp tastai aldy.
"Naýqastyń qaýipsizdigi turǵysynan bul tehnologiianyń artyqshylyǵy aiqyn kórinedi. Óitkeni adamnyń basynyń ishinde baǵyt kórsetetin jol belgileri joq", - dedi Ris Hibbert.
Osydan 18 ai buryn 48 jastaǵy Ris Hibberttiń densaýlyǵyna qatysty eshqandai shaǵymy bolmaǵan. Klientterge qyzmet kórsetý jónindegi menedjer bolyp jumys isteitin ol kún saiyn túski úzilis kezinde shamamen úsh shaqyrym jaiaý júretin.
Osyndai serýenderdiń birinde er adam kóshede kenetten esinen tanyp, denesi qurysa bastaǵan. Keiin júrgizilgen tekserý onyń gipofizinde kólemi 11 millimetr bolatyn qatersiz isik ósip kele jatqanyn anyqtady.
Gipofiz – bas súiektiń túbinde ornalasqan, kólemi shaǵyn shar tárizdi mańyzdy múshe. Ol aǵzadaǵy birqatar gormonnyń bólinýin retteidi.
