Qazaqstanda eńbek naryǵyndaǵy suranystyń basym bóligi bes negizgi salada shoǵyrlanǵan. Eńbek jáne halyqty áleýmettik qorǵaý ministrliginiń málimetinshe, bul salalar barlyq bos jumys oryndarynyń 66,4 paiyzyn quraidy, dep habarlaidy Dalanews.kz.
Eń kóp bos jumys orny dástúrli túrde bilim berý salasynda tirkelgen – 33 myńnan astam. Odan keiin qyzmet kórsetý salasy (11,4 myń), densaýlyq saqtaý jáne áleýmettik qyzmet kórsetý (9,7 myń), memlekettik basqarý (7 myń) jáne óńdeý ónerkásibi (6,9 myń) keledi.
Jalpy suranystyń jartysyna jýyǵy jumysshy mamandyqtarǵa tiesili – 48,9 myń bos jumys orny nemese 47,6 paiyz. Eń kóp qajet mamandar qatarynda medbikeler (1,9 myń), sanitarlar men júrgizýshiler (árqaisysy 1,8 myń), sondai-aq matematika páni muǵalimderi (1,7 myń) bar.
2026 jyldyń basynan beri Enbek.kz platformasynda 102,7 myń bos jumys orny jariialanyp, 162,4 myń túiindeme ornalastyrylǵan. Iaǵni bir jumys ornyna orta eseppen 1,58 úmitkerden keledi. Vakansiialardyń 80 paiyzdan astamy bilikti mamandarǵa arnalǵan.
Óńirler boiynsha bos jumys oryndary eń kóp Astanada (8,9 myń), Túrkistan oblysynda (7,3 myń), Qaraǵandy oblysynda (7,1 myń) jáne Almatyda (6,9 myń) tirkelgen.
Al jumys izdeýshiler eń kóp Túrkistan oblysynan shyqqan. Jalpy sany 23 myń túiindeme kelip túsken. Sondai-aq Atyraý (12,2 myń), Mańǵystaý (11,3 myń), Qyzylorda (10,9 myń) oblystarynyń turǵyndary belsendilik tanytqan. Almatyda 10,8 myń, Astanada 10,6 myń túiindeme ornalastyrylǵan.
Jalaqyǵa kelsek, qańtar aiynda eń joǵary eńbekaqy burǵylaý sýpervaizerlerine (orta eseppen 991 myń teńgeden), taý-ken óndirisindegi ýchaske basshylaryna (876 myń teńgeden) jáne bas geologtarǵa (803 myń teńgeden) usynylǵan. Al jumys izdeýshiler arasynda eń joǵary jalaqy kútimi jańa ónimderdi ázirleý jobalarynyń jetekshilerinde (1,3 mln teńge), jeke sektordaǵy kommertsiialyq direktorlarda (1,2 mln teńge) jáne baptaý jáne synaq injenerlerinde (865 myń teńge) baiqalǵan.
