Májilis depýtaty Jarqynbek Amantaıuly qarasorany ósirip, óńdeýge zańdy túrde ruqsat beriletinin aıtty, dep habarlaıdy Dalanews.kz.
Jarqynbek Amantaıulynyń sózinshe, elimizde qarasoranyń belgili bir sortyn ósirýge ruqsat burynnan bar.
"Qarasora degen kezde bárimiz esirtkini esimizge alamyz. Negizinen onyń arnaıy sorttary bar. Ol óndiristik ónerkásiptik baǵytta qoldanylatyn sorttar. Elimizde tómen paıyzda qarasora ónimderin ósirýge ruqsat bar. Elimizde fransýzdyq sort óndiriledi. Biraq ol sapasy tómen ónim bolyp sanalady eken", deıdi depýtat.
Al sapaly ónimdi shyǵarý úshin esirtki deńgeıin 0,3 paıyzǵa kóterý qajettilik bolyp otyr.
"Esirtkilik quramyn 0,3 paıyzǵa kóterý qajet. Dál osy tájirıbeni Reseı, Ózbekstan sekildi elder paıdalanyp, 0,3 paıyzben ónimder óndirip otyr. Munda bir ǵana ónim emes, jip, arqan, dáke sekildi ónimder jaıly áńgime. Biraq basqa da ónim túrlerimen tizimdi keńeıtýge bolady", deıdi depýtat.
Onyń sózinshe, bul tájirıbeni utymdy paıdalanyp otyrǵan elder bar.
"Munda másele mynada: tek ataýyna qarap muny esirtki dep qaramaý kerek. Sebebi jabaıy ósetin anasha qarasoralar kemi 15 paıyzdan joǵary kórsetkishke ıe. Al munda 0,3 paıyz. Ol esirtki retinde qoldanýǵa kelmeıtin deńgeı. Sondyqtan qaýipti dep úreılenýdiń qajeti joq", deıdi májilis depýtaty.
Jarqynbek Amantaıulynyń sózinshe, bul jaǵdaı ishki ister mınıstrliginiń baqylaýynda bolady.
"Men talaptaryn surap bildim. Ol jerdiń qorshaýy temirmen qorshalǵan, qoımalardyń talaptary da erekshe bolady. Ony lısenzıalanǵan kúzet qyzmeti kúzetedi. Olardyń sany, talapqa saı kelýi İİM tarapynan udaıy qadaǵalanady. Áskerı baza sıaqty qatań kúzetetin aımaq bolady. Ekinshiden, qarasorany ósirýdiń negizgi aımaqtary retinde SQO, Túrkistan, Qyzylorda oblystary qarastyrylyp otyr eken. Investorlar da bul ónimdi ósirip, paıda tabýǵa múddeli bolyp otyr", dep túsindirdi depýtat.
