ءماجىلىس دەپۋتاتى جارقىنبەك امانتاي ۇلى قاراسورانى ءوسىرىپ، وڭدەۋگە زاڭدى تۇردە رۇقسات بەرىلەتىنىن ايتتى، دەپ حابارلايدى Dalanews.kz.
جارقىنبەك امانتاي ۇلىنىڭ سوزىنشە، ەلىمىزدە قاراسورانىڭ بەلگىلى ءبىر سورتىن وسىرۋگە رۇقسات بۇرىننان بار.
"قاراسورا دەگەن كەزدە ءبارىمىز ەسىرتكىنى ەسىمىزگە الامىز. نەگىزىنەن ونىڭ ارنايى سورتتارى بار. ول وندىرىستىك ونەركاسىپتىك باعىتتا قولدانىلاتىن سورتتار. ەلىمىزدە تومەن پايىزدا قاراسورا ونىمدەرىن وسىرۋگە رۇقسات بار. ەلىمىزدە فرانسۋزدىق سورت وندىرىلەدى. ءبىراق ول ساپاسى تومەن ءونىم بولىپ سانالادى ەكەن"، دەيدى دەپۋتات.
ال ساپالى ءونىمدى شىعارۋ ءۇشىن ەسىرتكى دەڭگەيىن 0،3 پايىزعا كوتەرۋ قاجەتتىلىك بولىپ وتىر.
"ەسىرتكىلىك قۇرامىن 0،3 پايىزعا كوتەرۋ قاجەت. ءدال وسى تاجىريبەنى رەسەي، وزبەكستان سەكىلدى ەلدەر پايدالانىپ، 0،3 پايىزبەن ونىمدەر ءوندىرىپ وتىر. مۇندا ءبىر عانا ءونىم ەمەس، ءجىپ، ارقان، داكە سەكىلدى ونىمدەر جايلى اڭگىمە. ءبىراق باسقا دا ءونىم تۇرلەرىمەن ءتىزىمدى كەڭەيتۋگە بولادى"، دەيدى دەپۋتات.
ونىڭ سوزىنشە، بۇل تاجىريبەنى ۇتىمدى پايدالانىپ وتىرعان ەلدەر بار.
"مۇندا ماسەلە مىنادا: تەك اتاۋىنا قاراپ مۇنى ەسىرتكى دەپ قاراماۋ كەرەك. سەبەبى جابايى وسەتىن اناشا قاراسورالار كەمى 15 پايىزدان جوعارى كورسەتكىشكە يە. ال مۇندا 0،3 پايىز. ول ەسىرتكى رەتىندە قولدانۋعا كەلمەيتىن دەڭگەي. سوندىقتان ءقاۋىپتى دەپ ۇرەيلەنۋدىڭ قاجەتى جوق"، دەيدى ءماجىلىس دەپۋتاتى.
جارقىنبەك امانتاي ۇلىنىڭ سوزىنشە، بۇل جاعداي ىشكى ىستەر مينيسترلىگىنىڭ باقىلاۋىندا بولادى.
"مەن تالاپتارىن سۇراپ ءبىلدىم. ول جەردىڭ قورشاۋى تەمىرمەن قورشالعان، قويمالاردىڭ تالاپتارى دا ەرەكشە بولادى. ونى ليسەنزيالانعان كۇزەت قىزمەتى كۇزەتەدى. ولاردىڭ سانى، تالاپقا ساي كەلۋى ءىىم تاراپىنان ۇدايى قاداعالانادى. اسكەري بازا سياقتى قاتاڭ كۇزەتەتىن ايماق بولادى. ەكىنشىدەن، قاراسورانى ءوسىرۋدىڭ نەگىزگى ايماقتارى رەتىندە سقو، تۇركىستان، قىزىلوردا وبلىستارى قاراستىرىلىپ وتىر ەكەن. ينۆەستورلار دا بۇل ءونىمدى ءوسىرىپ، پايدا تابۋعا مۇددەلى بولىپ وتىر"، دەپ ءتۇسىندىردى دەپۋتات.
