Qazaqstanda naýqastardyń jeke meditsinalyq derekterin saqtaý merzimi qysqarmaq, dep habarlaidy Dalanews.kz.
“Almaty” arnasynyń málimetinshe, Densaýlyq saqtaý ministrligi bul ózgeristi arnaiy qujatqa engizýdi josparlap otyr.
Jańa erejege sáikes, rentgen jáne biomagnittik sýretter, kompiýterlik tomografiia nátijeleri, endoskopiialyq zertteýler siiaqty birqatar meditsinalyq beineler endi 15 jylǵa deiin ǵana saqtalatyn bolady.
Bul ózgeristerge qatysty túsinikteme bergen Densaýlyq saqtaý ministrligi Elektrondyq densaýlyq saqtaýdy damytý departamentiniń bas sarapshysy Nurmahan Meldehanov meditsinalyq derekterdi saqtaý merzimine naqty reglament engiziletinin atap ótti.
“Qazirgi tańda eresekterdiń meditsinalyq beineleri 10 jyl, 15 jastan joǵary balalardyń derekteri 15 jyl boiy saqtalady. Buǵan deiin Qazaqstanda meditsinalyq beinelerdi saqtaý merzimin naqty retteitin normativtik-quqyqtyq aktiler bolmaǵan. Jańa ózgerister osy olqylyqty joiady. Qujat qazirgi ýaqytta talqylaý kezeńinde, keiin resmi túrde qabyldanatyn bolady”, – dedi Nurmahan Meldehanov.
Maman bul ózgerister meditsinalyq mekemeler men qyzmetkerlerge qosymsha júkteme túsirmeidi dep sendirdi.
“Kerisinshe, jańa reglament jumys barysyn jeńildetedi. Buryn meditsinalyq beineler 20-25 jylǵa deiin saqtalatyn. Endi naqty merzim bekitilgen soń, derekterdi saqtaý tártibi aiqyndalady. Sonymen qatar, halyq densaýlyǵy jáne densaýlyq saqtaý júiesi týraly zańnyń 60-babynyń 2-tarmaǵyna sáikes, tsifrlyq densaýlyq saqtaý sýbektileri meditsinalyq derekterdi ulttyq densaýlyq saqtaý pasportyna berý tártibin saqtaýy tiis. Bul – derekterdiń qaýipsizdigi men saqtalýyn qamtamasyz etetin mańyzdy qadam”, – dep túsindirdi sarapshy.
Qazirgi tańda bul ózgeristerdi retteitin normativtik-quqyqtyq akti talqylaný ústinde, jaqyn arada qujat resmi túrde bekitilýi múmkin.
