Qazaqstanda otandyq taýar óndirýshiler týraly biryńǵai tsifrlyq platforma jyl sońyna deiin iske qosylady. Bul týraly Úkimet otyrysynan keiin ótken baspasóz máslihatynda saýda jáne integratsiia ministri Arman Shaqqaliev málimdedi, dep habarlaidy dalanews.kz.
Ministrdiń aitýynsha, qazirgi ýaqytta ónerkásip salasyndaǵy áriptester otandyq taýar óndirýshilerdiń tizimin qalyptastyrý jumystaryn júrgizip jatyr. Al Saýda ministrligi ázirlep jatqan QazTrade Retail platformasy qazaqstandyq ónimderdi saýda jelilerinde ilgeriletýge baǵyttalǵan.
«Biz qazir QazTrade Retail platformasyn ázirlep jatyrmyz. Onyń negizgi maqsaty “Qazaqstanda jasalǵan” ónimder týraly tolyq aqparatty saýda jelilerine usyný. Kóp jaǵdaida dúkender belgili bir ónimniń elimizde óndiriletinin bilmeidi. Mysaly, jýǵysh zattardy nemese basqa da turmystyq taýarlardy shyǵaratyn kásiporyndardyń bar-joǵyn surap jatady. Sondyqtan bul platforma otandyq óndirýshiler týraly naqty aqparat beretin biryńǵai bazaǵa ainalady. Sonymen qatar ol dúkenderdiń sórelerindegi otandyq ónim úlesine qoiylatyn talaptardyń oryndalýyn baqylaýǵa múmkindik beredi. Platformany jyl sońyna deiin tanystyrýdy josparlap otyrmyz», - dedi Arman Shaqqaliev.
Ministrdiń sózinshe, óndirýshilerdi tizimge engizý kezinde óndiristik protsesterge qatysty naqty talaptar qoldanylady.
«Ár salanyń óz ereksheligine qarai tehnologiialyq talaptary bar. Mysaly, mashina jasaý salasynda dánekerleý, syrlaý siiaqty negizgi óndiristik operatsiialardyń Qazaqstan aýmaǵynda oryndalýy mindetti. Jalpy talaptar tehnologiialyq protsestiń naqty oryndalýyna negizdeledi. Osy kriteriiler arqyly ónimniń shyn máninde otandyq óndiris ekeni anyqtalady», - dedi ministr.
Baspasóz máslihatynda aýyl sharýashylyǵy vitse-ministri Azat Sultanov kompiýterlik tehnika óndirýshilerge qatysty qoiylǵan suraqqa da jaýap berdi.
Onyń aitýynsha, Qazaqstanda shyǵarylatyn tehnika túrleriniń tizimi jyl saiyn keńeiip keledi jáne oǵan tsifrlyq júielermen jumys isteitin tehnika da engizilgen.
«Qazirgi ýaqytta Qazaqstanda shyǵarylatyn tehnikalardyń úlken tizimi bar. Onyń ishinde álemdik brendterdiń elimizde qurastyrylatyn tehnikasy da bar. Sonymen qatar aýyl sharýashylyǵyna arnalǵan jańa tsifrlyq jabdyqtardy Qazaqstanda óndirý boiynsha birneshe investitsiialyq joba iske asyrylyp jatyr. Biz mundai óndiristerdi kezeń-kezeńimen damytýdy kózdep otyrmyz», - dedi Azat Sultanov.
Ol tolyq tsiklmen ónim shyǵaratyn kásiporyndar men importtyq bólshekterden tehnika qurastyratyn kompaniialardyń bir tizimde kórsetiletinin aitty.
«Iá, olar bir tizimde bolady. Qazaqstanda shyǵarylatyn tehnikalardyń tizimi qoldanystaǵy erejelerde jáne tiisti aqparattyq resýrstarda jariialanady. Sonymen qatar investitsiialyq sýbsidiialaý qaǵidalaryna tsifrlyq pasport engiziledi. Onda aýyl sharýashylyǵy taýaryn óndirýshilerge qajet tehnikalardyń tolyq tizimi qamtylady. Osy tizimge engizilgen tehnikany satyp alǵan jaǵdaida investitsiialyq sýbsidiia alý múmkindigi qarastyrylǵan», - dedi vitse-ministr.
