Qazaqstanda 2025 jyldyń I-toqsanynda qyzmetkerlerdiń ortasha jalaqysy 423,1 myń teńgeni qurap, ótken jylmen salystyrǵanda 9,2%-ǵa kóbeidi. Alaida infliatsiianyń joǵary deńgeiinen halyqtyń shynaiy satyp alý múmkindigi tek 1,2%-ǵa ǵana jaqsardy. Bul týraly Finprom.kz sarapshylarynyń saramtamasynda aitylady, dep habarlaidy Dalanews.kz.
Óńirlik kórsetkishterde eń joǵary jalaqy Atyraý (634,2 myń teńge), Mańǵystaý (621,3 myń teńge) jáne Ulytaý (599 myń teńge) oblystarynda tirkelse, eń tómengi jalaqy Soltústik Qazaqstan (300,1 myń teńge), Jetisý (308,4 myń teńge) jáne Jambyl (308,9 myń teńge) oblystarynda baiqalǵan.
"Elimizdiń 20 óńiriniń altaýynda halyqtyń shynaiy tabysy tómendep ketken. Bul degenimiz – atalǵan óńirlerdegi jalaqy mólsheri bir jyl burynǵy satyp alý qabiletin qamtamasyz ete almaidy. Atap aitsaq, Batys Qazaqstan oblysynda satyp alý qabileti 5,2%-ǵa, Atyraý oblysynda 3,9%-ǵa, Shyǵys Qazaqstan oblysynda 1,9%-ǵa, Qyzylorda oblysynda 1,2%-ǵa, Aqmola oblysynda 1,1%-ǵa jáne Mańǵystaý oblysynda 0,8%-ǵa tómendegen", - deidi sarapshylar.
Qaraǵandy oblysy – jalǵyz ózgerissiz qalǵan óńir. Al ózge aimaqtarda halyqtyń satyp alý múmkindigi 0,6%-dan (Abai oblysy) 9,1%-ǵa deiin (Ulytaý oblysy) ósken.
"Jalpy, biyl qańtar-maýsym aralyǵynda infliatsiia deńgeii respýblika boiynsha 10,4%-ǵa jetti. Onyń ishinde asa qymbatshylyq Astana qalasynda (12,4%), Aqmola (10,8%) jáne Qaraǵandy (10,6%) oblystarynda baiqaldy. Al baǵa ósimi eń tómen aimaqtar – Almaty (7,3%), Pavlodar (7,6%) jáne Jambyl (7,8%) oblystary".
Sonymen qatar, DEMOSCOPE zertteý ortalyǵynyń málimetinshe, halyqtyń kópshiligi qosymsha qun salyǵynyń (QQS) 12%-dan 16%-ǵa kóterilýine qarsy bolyp shyqty. Azamattardyń 56,7%-y bul salyq reformasyn qoldamaitynyn aitqan. Saýalnamaǵa qatysqandardyń 18,4%-y ózgerister týraly estimegen, tek 11,8%-y ǵana bul qadamdy quptasa, 8,1%-y beitarap ustanymda ekenin bildirgen.
Sarapshylardyń aitýynsha, QQS sheginiń 15 mln teńgege deiin tómendetilip, salyq júktemesiniń artýy baǵanyń ósýine ákelip soqtyrýy yqtimal. Sońǵy úsh aida halyqtyń 68,6%-y azyq-túlik pen kúndelikti qajetti taýarlarǵa jumsalatyn shyǵyny edáýir óskenin aitqan. Taǵy 13,9%-y shyǵynynyń azdap artqanyn baiqasa, 11%-ynda ózgeris bolmaǵan, al shyǵyn azaidy degenderdiń úlesi nebári – 2,8%.
"Degenmen, baǵanyń qymbattaýy qazaqstandyqtardyń negizgi alańdaýshylyǵyna jatpaidy. Halyqty eń qatty mazalaityn másele – tómen tabys pen jalaqy deńgeii. Ekinshi orynda – jemqorlyq máselesi, al kúndelikti tutynatyn taýarlardyń qymbattaýy tek úshinshi orynda tur",- deidi sarapshylar.
