2026 jyldyń 1 qańtarynan bastap Qazaqstanda BJZQ arqyly tólenetin zeinetaqy tólemderi 5% artady, dep habarlaidy Dalanews.kz.
BJZQ baspasóz qyzmeti bul ósim zeinetaqyny birneshe jyldan beri alatyn azamattarǵa qatysty ekenin málimdedi.
"2026 jyldyń 1 qańtarynan bastap BJZQ tólemderi 5%-ǵa ósedi. Bul ózgeris burynnan tólem alyp júrgen zeinetkerlerge qoldanylady. Aita keteiik, tólemder 2023 jylǵy 30 maýsymdaǵy Qazaqstan Úkimetiniń qaýlysymen bekitilgen ádistemege sáikes esepteledi. Sol boiynsha, tólemniń alǵashqy jyly zeinetaqy jinaǵy 6,5% mólsherlemesimen eseptelip, 12 aiǵa bólinedi. Kelesi jyldary ai saiynǵy tólem 5% indeksatsiia mólsherlemesi boiynsha artady", - delingen habarlamada.
Minimaldy ailyq tólem azamatynyń tabysy men zańda belgilengen ómir súrý minimýmynyń 70%-nan kem bolmaýy tiis. 2026 jyly ómir súrý minimýmy 50 851 teńge bolyp belgilengen. Eń joǵarǵy tólem mólsheri shektelmegen jáne árbir tólem alýshynyń zeinetaqy jinaǵynyń kólemine bailanysty anyqtalady.
"Ádistemede zeinetaqy tólemderin esepteý úshin qoldanylatyn qosymsha koeffitsientter qarastyrylǵan. Olar mynalarǵa qatysty: ómir boiyna nemese merzimsiz 1 nemese 2 toptaǵy múgedekter, sondai-aq zeinet jasyna jetken jáne keminde 60 ai mindetti kásibi zeinetaqy jarnasyn tólegen azamattar. Eger azamat eki shartqa da sai bolsa, tólemge eń joǵary koeffitsient qoldanylady", - dep habarlady BJZQ baspasóz qyzmeti.
Sonymen qatar tólemder jinaqtalǵan qarajat kólemine tikelei bailanysty, ol turaqty jarnalar men investitsiialyq kiris esebinen qalyptasady. BJZQ tólemderi jeke zeinetaqy shotyndaǵy qarajat tolyq jumsalǵanǵa deiin júrgiziledi. Bul jinaqtar qatysýshynyń menshigi bolyp sanalady jáne azamattyq zańnamaǵa sáikes muragerlikke beriledi.
