Qazaqstanda bankter, mikroqarjy jáne saqtandyrý uiymdary usynatyn qarjy ónimderine qatysty tutynýshylardyń quqyǵyn qorǵaý talaptary kúsheitiledi. Qarjy naryǵyn retteý jáne damytý agenttigi osy baǵyttaǵy jańa erejelerdi maquldady, dep habarlaidy dalanews.kz.
Jańa tártipke sáikes, qarjy uiymdary árbir ónimdi naryqqa shyǵarmas buryn onyń tutynýshyǵa áserin baǵalaýǵa mindetti. Ónimdi paidalaný barysynda klientter úshin táýekelder anyqtalsa, uiymdar onyń sharttaryn qaita qarap nemese satylymyn toqtatýy tiis.
Endi qarjy uiymdary kelisimshart jasasar aldynda klienttiń qarjylyq jaǵdaiyn, kózdegen maqsatyn jáne yqtimal táýekelderdi kóterý múmkindigin eskerip, usynylatyn ónimniń oǵan sáikes keletinin anyqtaidy. Sonymen qatar ónimniń quny, negizgi sharttary, artyqshylyqtary men yqtimal táýekelderi qarapaiym ári túsinikti tilde túsindirilip, eshqandai aqparat jasyrylmaýy qajet.
Agenttik málimetinshe, qujatta qarjy ónimderin jarnamalaý, usyný jáne olarǵa qyzmet kórsetý kezinde saqtalýy tiis biryńǵai standarttar belgilengen.
"Qarjy uiymdary ónimniń quny, sharttary, artyqshylyqtary jáne táýekelderi týraly naqty ári teńgerimdi aqparat usynýǵa mindetti. Sondai-aq adal emes jarnama tásilderin qoldanýǵa jol berilmeidi. Bul talaptar azamattarǵa sáikes kelmeitin qarjy ónimderiniń usynylýyn azaityp, olardyń sanaly qarjylyq sheshim qabyldaýyna múmkindik beredi", - dep habarlady agenttik.
Sonymen qatar retteýshi aldaǵy ýaqytta qarjy uiymdarynyń zań talaptaryn oryndaýyn ǵana emes, olardyń ónimderi tutynýshylardyń múddesine ziian keltirmeitinin de baqylaýǵa alady.
