Qazaqstanda áýejaılar áýekerosınniń bólshek baǵasyn 1,5-2 esege kóterip otyr, dep habarlaıdy Dalanews.kz Senattyń baspasóz qyzmetine siltep.

«Qazirgi ýaqytta ishki naryqta áýekerosınniń kóterme baǵasy tonnasyna 650-850 dollar deńgeıinde qalyptasqan. Sonymen qatar, áýejaılarda áýekerosınniń bólshek baǵasy - tonnasyna 1100-1200 dollar deńgeıinde. Sońǵy bes jylda sheteldik áýe kompanıalary oryndaǵan halyqaralyq reıster sany 58%-ǵa qysqardy. Júk áýetasymaly kólemi 36%-ǵa tómendedi», – delingen Senattyń habarlamasynda QR Kólik mınıstrliginiń derekterine silteme jasaı otyryp.

Osylaısha, ishki naryqtaǵy áýekerosıniniń kóterme baǵasy men áýejaılardaǵy bólshek baǵasy arasyndaǵy aıyrmashylyq 1,5-2 ese bolyp otyr.

Senat málimetinshe, áýejaılar táýelsiz janarmaı jetkizýshilerin ózderiniń saqtaý ınfraqurylymyna kirgizýdi shekteý tájirıbesin qoldanýda, bul áýe kompanıalary úshin janarmaıdyń qymbat bolýyna sebep bolyp otyr.

Sonymen qatar, áýe bıleti qunynyń qurylymynda eń úlken úles – 36,5% áýekerosın shyǵyndaryna tıesili, 14,9% – tehnıkalyq qyzmet kórsetý, 10,7% – áýejaılyq qyzmet kórsetý, 8,6% – ushaqty jalǵa alý, al qalǵany – ushý qashyqtyǵy, suranystyń maýsymdylyǵy jáne satyp alý kúnimen baılanysty.

2023 jyly jalpy tutyný kólemi 883 myń tonnany qurady, onyń ishinde otandyq áýekerosınniń úlesi 72%, ımporttyń úlesi 28% boldy. Aqparatta otandyq áýe kompanıalary janarmaıdyń 60%-yn, al sheteldik áýe kompanıalary 40%-yn paıdalanǵan.