قازاقستاندا اۋەجايلار اۋەكەروسيننىڭ بولشەك باعاسىن 1،5-2 ەسەگە كوتەرىپ وتىر، دەپ حابارلايدى Dalanews.kz سەناتتىڭ باسپا ءسوز قىزمەتىنە سىلتەپ.
«قازىرگى ۋاقىتتا ىشكى نارىقتا اۋەكەروسيننىڭ كوتەرمە باعاسى تونناسىنا 650-850 دوللار دەڭگەيىندە قالىپتاسقان. سونىمەن قاتار، اۋەجايلاردا اۋەكەروسيننىڭ بولشەك باعاسى - تونناسىنا 1100-1200 دوللار دەڭگەيىندە. سوڭعى بەس جىلدا شەتەلدىك اۋە كومپانيالارى ورىنداعان حالىقارالىق رەيستەر سانى 58%-عا قىسقاردى. جۇك اۋەتاسىمالى كولەمى 36%-عا تومەندەدى»، – دەلىنگەن سەناتتىڭ حابارلاماسىندا ق ر كولىك مينيسترلىگىنىڭ دەرەكتەرىنە سىلتەمە جاساي وتىرىپ.
وسىلايشا، ىشكى نارىقتاعى اۋەكەروسينىنىڭ كوتەرمە باعاسى مەن اۋەجايلارداعى بولشەك باعاسى اراسىنداعى ايىرماشىلىق 1،5-2 ەسە بولىپ وتىر.
سەنات مالىمەتىنشە، اۋەجايلار تاۋەلسىز جانارماي جەتكىزۋشىلەرىن وزدەرىنىڭ ساقتاۋ ينفراقۇرىلىمىنا كىرگىزۋدى شەكتەۋ تاجىريبەسىن قولدانۋدا، بۇل اۋە كومپانيالارى ءۇشىن جانارمايدىڭ قىمبات بولۋىنا سەبەپ بولىپ وتىر.
سونىمەن قاتار، اۋە بيلەتى قۇنىنىڭ قۇرىلىمىندا ەڭ ۇلكەن ۇلەس – 36،5% اۋەكەروسين شىعىندارىنا تيەسىلى، 14،9% – تەحنيكالىق قىزمەت كورسەتۋ، 10،7% – اۋەجايلىق قىزمەت كورسەتۋ، 8،6% – ۇشاقتى جالعا الۋ، ال قالعانى – ۇشۋ قاشىقتىعى، سۇرانىستىڭ ماۋسىمدىلىعى جانە ساتىپ الۋ كۇنىمەن بايلانىستى.
2023 جىلى جالپى تۇتىنۋ كولەمى 883 مىڭ توننانى قۇرادى، ونىڭ ىشىندە وتاندىق اۋەكەروسيننىڭ ۇلەسى 72%، يمپورتتىڭ ۇلەسى 28% بولدى. اقپاراتتا وتاندىق اۋە كومپانيالارى جانارمايدىڭ 60%-ىن، ال شەتەلدىك اۋە كومپانيالارى 40%-ىن پايدالانعان.
