Qazaqstanda ǵylymdy damytýǵa baǵyttalǵan jańa bastama qolǵa alyndy, dep habarlaidy dalanews.kz.
Senat ǵylym, bilim berý, densaýlyq saqtaý, áleýmettik qamsyzdandyrý jáne áskeri qyzmet máseleleri boiynsha zańdy maquldady. Qujat aiasynda elimizde alǵash ret ǵylym qalashyqtary men ǵylymi-tehnologiialyq parkter qurýǵa quqyqtyq negiz qalyptasady.
Jańa zań ǵylymi zertteýlerdi óndirispen ushtastyrýǵa, joǵary tehnologiialyq óndiristerdi damytýǵa jáne ǵylymi jobalardy kommertsiialandyrýǵa baǵyttalǵan. Ǵylym qalashyqtary men ǵylymi-tehnologiialyq parkter ǵalymdar, zertteý uiymdary jáne biznes ókilderi úshin birlesken alańǵa ainalmaq.
Zań aiasynda ǵylymi uiymdardyń ujymdyq paidalanýdaǵy zerthanalarǵa teń qoljetimdiligi qamtamasyz etiledi. Bul ǵylymi infraqurylymdy tiimdi paidalanýǵa jáne zertteý júrgizý múmkindikterin keńeitýge jol ashady.
Sonymen qatar jetekshi ǵalymdarǵa arnalǵan jańa áleýmettik qoldaý sharasy engiziledi. Endi joǵary jáne joǵary oqý ornynan keiingi bilim berý uiymdarynda, sondai-aq ǵylymi mekemelerde jumys isteitin jetekshi ǵalymdarǵa shyǵarmashylyq demalys berý qarastyrylǵan.
Qujatta ǵylymdy qarjylandyrý tetikterin jetildirý máselesi de qamtylǵan. Ǵylymi uiymdarǵa birneshe qarjylandyrý kózinen bir mezgilde qarajat alýǵa múmkindik beriledi. Onyń ishinde jer qoinaýyn paidalanýshylardyń aýdarymdary esebinen qarjylandyrý tetigi de qarastyrylǵan.
Sondai-aq zańmen Ulttyq ǵylym akademiiasynyń qarjylandyrý kózderi naqtylandy. Akademiia qyzmeti biýdjet qarajaty jáne zańmen tyiym salynbaǵan ózge de qarjy kózderi arqyly qamtamasyz etiledi.
Budan bólek, mektep oqýlyqtaryndaǵy qatelikter úshin baspalardyń jaýapkershiligi kúsheitiledi. Eger oqýlyqtaǵy qatelik baspanyń kinásinen anyqtalsa, onyń taralymy baspa esebinen aýystyrylatyn bolady.
Senatorlardyń pikirinshe, qabyldanǵan túzetýler otandyq ǵylymnyń áleýetin arttyryp, ǵylymi jańalyqtardy ekonomikaǵa engizý úderisin jedeldetýge múmkindik beredi.
