Қазақстанда ғылымды дамытуға бағытталған жаңа бастама қолға алынды, деп хабарлайды dalanews.kz.
Сенат ғылым, білім беру, денсаулық сақтау, әлеуметтік қамсыздандыру және әскери қызмет мәселелері бойынша заңды мақұлдады. Құжат аясында елімізде алғаш рет ғылым қалашықтары мен ғылыми-технологиялық парктер құруға құқықтық негіз қалыптасады.
Жаңа заң ғылыми зерттеулерді өндіріспен ұштастыруға, жоғары технологиялық өндірістерді дамытуға және ғылыми жобаларды коммерцияландыруға бағытталған. Ғылым қалашықтары мен ғылыми-технологиялық парктер ғалымдар, зерттеу ұйымдары және бизнес өкілдері үшін бірлескен алаңға айналмақ.
Заң аясында ғылыми ұйымдардың ұжымдық пайдаланудағы зертханаларға тең қолжетімділігі қамтамасыз етіледі. Бұл ғылыми инфрақұрылымды тиімді пайдалануға және зерттеу жүргізу мүмкіндіктерін кеңейтуге жол ашады.
Сонымен қатар жетекші ғалымдарға арналған жаңа әлеуметтік қолдау шарасы енгізіледі. Енді жоғары және жоғары оқу орнынан кейінгі білім беру ұйымдарында, сондай-ақ ғылыми мекемелерде жұмыс істейтін жетекші ғалымдарға шығармашылық демалыс беру қарастырылған.
Құжатта ғылымды қаржыландыру тетіктерін жетілдіру мәселесі де қамтылған. Ғылыми ұйымдарға бірнеше қаржыландыру көзінен бір мезгілде қаражат алуға мүмкіндік беріледі. Оның ішінде жер қойнауын пайдаланушылардың аударымдары есебінен қаржыландыру тетігі де қарастырылған.
Сондай-ақ заңмен Ұлттық ғылым академиясының қаржыландыру көздері нақтыланды. Академия қызметі бюджет қаражаты және заңмен тыйым салынбаған өзге де қаржы көздері арқылы қамтамасыз етіледі.
Бұдан бөлек, мектеп оқулықтарындағы қателіктер үшін баспалардың жауапкершілігі күшейтіледі. Егер оқулықтағы қателік баспаның кінәсінен анықталса, оның таралымы баспа есебінен ауыстырылатын болады.
Сенаторлардың пікірінше, қабылданған түзетулер отандық ғылымның әлеуетін арттырып, ғылыми жаңалықтарды экономикаға енгізу үдерісін жеделдетуге мүмкіндік береді.
