Qazaqstanda Memleket basshysy Qasym-Jomart Toqaevtyń bastamasymen júrgizilgen ákimshilik raqymshylyq aiasynda 681,7 myń azamatqa qatysty 1,3 million ákimshilik is toqtatyldy. Bul týraly Bas prokýror Berik Asylov málimdedi, dep habarlaidy dalanews.kz.
Onyń aitýynsha, táýelsiz Qazaqstan tarihynda alǵash ret júzege asqan ákimshilik raqymshylyq jańa halyqtyq Konstitýtsiianyń alǵashqy mańyzdy praktikalyq nátijeleriniń biri boldy.
Berik Asylovtyń málimetinshe, raqymshylyq aiasynda jalpy somasy 22,8 mlrd teńge bolatyn aiyppuldar keshirildi. Ol Ákimshilik quqyq buzýshylyq týraly kodekstiń 380-nen astam babyn qamtydy. Atap aitqanda, salyq, keden, sanitariialyq, ekologiialyq talaptardy buzý, kásipkerlik, saýda jáne basqa da ákimshilik quqyq buzýshylyqtar boiynsha qabyldanǵan sheshimderge qatysty qoldanyldy.
Bas prokýrordyń aitýynsha, raqymshylyq politsiia, memlekettik kirister, ekologiia, sanitariialyq-epidemiologiialyq baqylaý jáne basqa da memlekettik organdar anyqtaǵan, ákimshilik qamaq jazasy kózdelmegen quqyq buzýshylyqtarǵa qatysty júrgizildi.
Sonymen qatar azamattardan eshqandai ótinish berý talap etilmegen. Raqymshylyq tolyqtai tsifrlyq formatta iske asyrylyp, memlekettik organdardyń úilesimdi jumysynyń arqasynda bir aiǵa jetpeitin merzimde aiaqtalǵan.
«Azamattar memlekettik organdardy aralaǵan joq, qujat jinaǵan joq jáne biýrokratiialyq rásimderden ótpedi. Ákimshilik isterdiń toqtatylǵany týraly olar SMS-habarlama arqyly aqparat aldy», – dedi Bas prokýror.
Berik Asylovtyń sózinshe, kóptegen otbasy úshin bul tek aiyppuldan bosatý ǵana emes, sonymen qatar atqarýshylyq óndiristerdiń toqtatylýyna, qoiylǵan shekteýlerdiń alynýyna jáne arnaiy turaqqa qoiylǵan kólikterdiń ielerine qaitarylýyna múmkindik berdi.
Mysal retinde Jetisý oblysynyń turǵyny keltirildi. Onyń avtokóligi jyl basynan beri tólenbegen aiyppuldarǵa bailanysty aiyp turaǵynda turǵan. Ákimshilik raqymshylyq týraly zań kúshine engennen keiin oǵan qatysty ákimshilik ister toqtatylyp, kóligi iesine qaitarylǵan. Bas prokýrordyń aitýynsha, raqymshylyqty júzege asyrýǵa prokýratýra, ishki ister organdary, memlekettik kirister organdary, ekologiia qyzmeti, jergilikti atqarýshy organdar jáne basqa da memlekettik mekemeler qatysqan.
Ol raqymshylyqty iske asyrýdaǵy basty qaǵidat ózgermegenin atap ótti.
«Raqymshylyq jasaýǵa quqyǵy bar árbir azamat ony mindetti túrde alýǵa tiis, al zań talaptaryna sáikes kelmeitin eshkim bul múmkindikti paidalanbaýy qajet», – dedi Berik Asylov.
Bas prokýrordyń pikirinshe, bul tájiribe tsifrlyq tehnologiialardyń memlekettik basqarýdyń tiimdiligin arttyryp qana qoimai, azamattardy artyq biýrokratiialyq rásimderden bosatýǵa múmkindik beretinin kórsetti.
