Qazaqstanda biyl 5 mln tonnadan astam maily daqyl jinaý kútiledi, al aýyl sharýashylyǵynyń jalpy ónim kólemi toǵyz aida 5,8%-ǵa ósip, 7,3 trln teńgege jetti, dep habarlaidy dalanews.kz.
2026 jyldyń qańtar-qyrkúiek ailarynda ósimdik sharýashylyǵynyń óndirisi 7,6%-ǵa artyp, 4 trln teńgeni, al mal sharýashylyǵynyń ónimi 3,5%-ǵa ósip, 3,2 trln teńgeni qurady.
Elimizde qazirdiń ózinde 23 mln tonna astyq jinaldy. Egis alqaptarynyń 96%-y orylyp, ortasha ónimdilik gektaryna 15,2 tsentnerdi qurady. Kúrdeli klimattyq jaǵdailar men bidai egisiniń qysqarýyna qaramastan, astyq túsimi kópjyldyq ortasha deńgeiden joǵary bolady dep boljanyp otyr.
Maily daqyldar boiynsha da joǵary nátije kútiledi. Qazir 3,7 mln tonna ónim jinalǵan. Bul ótken jylǵy kórsetkishten 2,5 ese kóp. Maýsym qorytyndysynda maily daqyldar ónimi 5 mln tonnadan asýy múmkin.
Alaida mol ónim jinaýmen qatar, ony saqtaý jáne naryqqa ýaqytyly jetkizý máselesi de mańyzdy. Qyrkúiekte jańa ónim eksporty 1,1 mln tonnany qurap, bir jylda 13%-ǵa ósti. Aýyl sharýashylyǵy ministrligi astyq qabyldaý kásiporyndarynyń úzdiksiz jumysyn qamtamasyz etip, qolda bar logistikalyq múmkindikterdi tiimdi paidalanýǵa nazar aýdaryp otyr.
Azyq-túlik óndirisinde de ósim baiqalady. Toǵyz aida óndiris kólemi 13,8%-ǵa artyp, 3,2 trln teńgege jetti. Ósimdik maiynyń óndirisi 25,2%-ǵa, un óndirisi 13,9%-ǵa, al balmuzdaq óndirisi 51,7%-ǵa ulǵaiǵan.
Ministrliktiń boljamynsha, jyl sońynda aýyl sharýashylyǵynyń jalpy ónim kólemi 6%-ǵa, azyq-túlik óndirisi 9,5%-ǵa ósedi.
