Aýǵanstan biligi BBC-diń FM radiohabarlaryn búkil el aýmaǵynda belgisiz merzimge toqtatty, sheshimniń sebebi retinde birneshe ret qaitalanǵan zańbuzýshylyqtardy ataǵanymen, naqty qandai talaptardyń buzylǵanyn túsindirmedi, dep habarlaidy dalanews.kz.
Britandyq BBC teleradiokorporatsiiasy Aýǵanstanda FM jiilikteri arqyly habar taratýdyń toqtatylǵanyn málimdedi. Talibter úkimetiniń Aqparat jáne mádeniet ministrliginiń ókili Hýbib Gýfran sheshimniń belgisiz merzimge qabyldanǵanyn rastady.
Onyń aitýynsha, mundai sharaǵa «qaitalanǵan zańbuzýshylyqtar» sebep bolǵan. Alaida ministrlik BBC-ge naqty qandai aiyp taǵylǵanyn ashyp aitpady.
BBC ókili milliondaǵan aýǵandyq úshin korporatsiia jańalyqtar men aqparattyń mańyzdy kózi ekenin atap ótti. Onyń sózinshe, uiym habar taratýdy qalpyna keltirý úshin Aýǵanstan biligimen kelissóz júrgizip jatyr.
Aýǵanstanda 2021 jyly talibter bilikke oralǵannan keiin buqaralyq aqparat quraldarynyń jumysyna birqatar shekteý engizildi. Ásirese internetke qoljetimdiligi shekteýli óńirlerde radio halyqtyń aqparat alýyndaǵy mańyzdy arnalardyń biri bolyp sanalady.
FM habarlarynyń toqtatylýy BBC baǵdarlamalarynyń búkil el boiynsha radiojiilikter arqyly taralýyna áser etedi. Degenmen, qazirgi málimetter korporatsiianyń Aýǵanstandaǵy barlyq qyzmeti tolyq toqtatylǵanyn bildirmeidi.
