Eurasian Resources Group (ERG) taý-ken holdingi aktsiialarynyń 40%-yna ie Qazaqstan Úkimeti óz úlesin satýdy qarastyryp otyrǵan joq, dep habarlaidy Dalanews.kz.
"Qazaqstan Respýblikasy Qarjy ministrliginiń Memlekettik múlik jáne jekeshelendirý komiteti Reuters aqparattyq agenttiginiń Djeims Kemeronnyń Eurasian Resources Group kompaniiasynyń 100%-ǵa deiingi aktsiiasyn satyp alý týraly usynysyna qatysty taratqan aqparat boiynsha mynany aitamyz: kompaniianyń 40% aktsiiasynyń menshik iesi bolyp tabylatyn Qazaqstan Respýblikasynyń Úkimeti ERG-degi memleketke tiesili aktsiialaryn satýdy qarastyrmaidy", - dep jaýap bergen Qarjy ministrligi Interfaks agenttiginiń saýalyna bergen jaýabynda
Buǵan deiin Reuters agenttigi óz qoldaryna túsken qujattarǵa silteme jasai otyryp, Petropavlovsk Plc Direktorlar keńesiniń burynǵy basshysy, amerikalyq kásipker Djeims Kemeron ERG aktsiialarynyń 100-yn 5 mlrd dollarǵa satyp alýǵa nietti ekenin habarlaǵan.
Agenttiktiń habarlaýynsha, onyń ERG Direktorlar keńesine jazǵan hatynda amerikalyq Goldman Sachs banki mámile boiynsha aldyn ala keńesý úshin kelissózder júrgizip jatqany kórsetilgen.
Keiin, 21 sáýirde kompaniiadaǵylar Petropavlovsk Direktorlar keńesiniń burynǵy basshysy Djeims Kemeronmen kelissózder júrgizilip jatqany týraly aqparatty joqqa shyǵardy. ERG málimetteri boiynsha, biznesti júrgizýde qandai da bir ózgerister joq.
ERG Eurasian National Resources Corporation (ENRC) aktivteri negizinde 2014 jyly qurylǵan. Korporatsiia (ENRC) Liýksembýrgte tirkelgen. Kompaniia Qazaqstandaǵy ferroqorytpa, temir, aliýminii, kómir kenderin óndirýshi kásiporyndardyń basyn qurap, sondai-aq Afrikadaǵy mys jáne kobalt aktivterine ie jáne Braziliiada temir kenin óndirý jobasyn júzege asyrady.
Qazaqstan territoriiasynda ERG-dyń óndiristik aktivterine "Qazhrom TUK", "Aliýminii Qazaqstan" SSKÓB, Qazaqstan elektroliz zaýyty, " Eýroaziialyq energetikalyq korporatsiiasy, "Shubarkól Kómir", "TransKom" transporttyq toby enedi.
ERG aktsionerleri - Qazaqstannyń Qarjy ministrligi (40%), marqum Aleksandr Mashkevich jáne Ibragimovtar otbasy (árqaisysy 20,7%-dan úleske ie), Patoh Shodiev (18,6%). Ázirge, 2025 jyly naýryzda Aleksandr Mashkevich qaitys bolǵannan keiin aktsionerlerdiń qurylymy qalai ózgergeni belgisiz.
