Qazaqstan Bas prokýratýrasy janyndaǵy Aktivterdi qaitarý jónindegi komitet Dinara Qulybaevanyń Shveitsariiadaǵy jyljymaityn múlik mámilelerin tekserýge esh qatysy joq ekenin málimdedi. Bul týraly vedomstvo «Ordanyń» resmi saýalyna bergen jaýabynda aitylǵan, dep habarlaidy Dalanews.kz.
Komitettiń málimetinshe, Shveitsariia quqyq qorǵaý organdary Qulybaevanyń aktivteriniń zańdylyǵyn tekserý úshin Qazaqstan tarapyna resmi suranys jasamaǵan.
«Qazirgi ýaqytta Dinara Qulybaevanyń aktivteriniń zańdylyǵyn tekserý boiynsha QR Bas prokýratýrasyna eshqandai suranys túsken joq jáne QR Bas prokýratýrasy tarapynan Shveitsariia Konfederatsiiasyna mundai suranystar joldanǵan joq», — delingen resmi jaýapta.
Sonymen qatar, komitet aktivterdi qaitarý boiynsha júrgiziletin kez kelgen suraý men aqparat almasý «shektelgen aqparat» sanatyna jatatynyn eske saldy.
Alaida bul jaýap Qazaqstannyń basqa quqyq qorǵaý nemese qadaǵalaý organdary Shveitsariiaǵa Qulybaeva 2019-2020 jyldary Jenevada jasaǵan mámilelerdi tekserý týraly suranys jibermedi degendi bildirmeidi. Mundai suranys bank arnalary arqyly da túsýi múmkin, óitkeni bul qomaqty qarajat elitalyq jyljymaityn múlikti satyp alý úshin paidalanylǵan.
Qyzyq derek — 2024 jyldyń qarashasynda Qazaqstan men Shveitsariia qylmystyq ister boiynsha ózara quqyqtyq kómek kórsetý jáne zańsyz shyǵarylǵan aktivterdi qaitarý tetikterin jetildirý týraly kelisimge qol qoiǵan bolatyn. Bul kelisim eki eldiń prokýratýralaryna kúmándi mámileler boiynsha aqparat almasýǵa múmkindik beredi. Sondyqtan Shveitsariiadan Qulybaevanyń saraiyna qatysty suranys túsýi áli de múmkin.
Dinara Qulybaeva — Qazaqstannyń Tuńǵysh prezidenti Nursultan Nazarbaevtyń qyzy jáne belgili oligarh Timýr Qulybaevtyń jubaiy. Ol 2019 jyldyń tamyzy men 2020 jyldyń shildesi aralyǵynda Jenevada jalpy quny 126 mln shveitsar frankin (shamamen 69,7 mlrd teńge) quraityn úsh jyljymaityn múlik nysanyn satyp alǵan. Solardyń biri — ataqty Belriv saraiy.
Ótken aptada Jeneva prokýratýrasy osy mámilelerge qatysty qylmystyq is boiynsha tergeý júrgizip jatqanyn málimdegen edi.
