قازاقستان باس پروكۋراتۋراسى جانىنداعى اكتيۆتەردى قايتارۋ جونىندەگى كوميتەت دينارا قۇلىبايەۆانىڭ شۆەيسارياداعى جىلجىمايتىن مۇلىك مامىلەلەرىن تەكسەرۋگە ەش قاتىسى جوق ەكەنىن مالىمدەدى. بۇل تۋرالى ۆەدومستۆو «وردانىڭ» رەسمي ساۋالىنا بەرگەن جاۋابىندا ايتىلعان، دەپ حابارلايدى Dalanews.kz.
كوميتەتتىڭ مالىمەتىنشە، شۆەيساريا قۇقىق قورعاۋ ورگاندارى قۇلىبايەۆانىڭ اكتيۆتەرىنىڭ زاڭدىلىعىن تەكسەرۋ ءۇشىن قازاقستان تاراپىنا رەسمي سۇرانىس جاساماعان.
«قازىرگى ۋاقىتتا دينارا قۇلىبايەۆانىڭ اكتيۆتەرىنىڭ زاڭدىلىعىن تەكسەرۋ بويىنشا ق ر باس پروكۋراتۋراسىنا ەشقانداي سۇرانىس تۇسكەن جوق جانە ق ر باس پروكۋراتۋراسى تاراپىنان شۆەيساريا كونفەدەراسياسىنا مۇنداي سۇرانىستار جولدانعان جوق»، — دەلىنگەن رەسمي جاۋاپتا.
سونىمەن قاتار، كوميتەت اكتيۆتەردى قايتارۋ بويىنشا جۇرگىزىلەتىن كەز كەلگەن سۇراۋ مەن اقپارات الماسۋ «شەكتەلگەن اقپارات» ساناتىنا جاتاتىنىن ەسكە سالدى.
الايدا بۇل جاۋاپ قازاقستاننىڭ باسقا قۇقىق قورعاۋ نەمەسە قاداعالاۋ ورگاندارى شۆەيسارياعا قۇلىبايەۆا 2019-2020 جىلدارى جەنيەۆادا جاساعان مامىلەلەردى تەكسەرۋ تۋرالى سۇرانىس جىبەرمەدى دەگەندى بىلدىرمەيدى. مۇنداي سۇرانىس بانك ارنالارى ارقىلى دا ءتۇسۋى مۇمكىن، ويتكەنى بۇل قوماقتى قاراجات ەليتالىق جىلجىمايتىن مۇلىكتى ساتىپ الۋ ءۇشىن پايدالانىلعان.
قىزىق دەرەك — 2024 جىلدىڭ قاراشاسىندا قازاقستان مەن شۆەيساريا قىلمىستىق ىستەر بويىنشا ءوزارا قۇقىقتىق كومەك كورسەتۋ جانە زاڭسىز شىعارىلعان اكتيۆتەردى قايتارۋ تەتىكتەرىن جەتىلدىرۋ تۋرالى كەلىسىمگە قول قويعان بولاتىن. بۇل كەلىسىم ەكى ەلدىڭ پروكۋراتۋرالارىنا كۇماندى مامىلەلەر بويىنشا اقپارات الماسۋعا مۇمكىندىك بەرەدى. سوندىقتان شۆەيساريادان قۇلىبايەۆانىڭ سارايىنا قاتىستى سۇرانىس ءتۇسۋى ءالى دە مۇمكىن.
دينارا قۇلىبايەۆا — قازاقستاننىڭ تۇڭعىش پرەزيدەنتى نۇرسۇلتان نازاربايەۆتىڭ قىزى جانە بەلگىلى وليگارح تيمۋر قۇلىبايەۆتىڭ جۇبايى. ول 2019 جىلدىڭ تامىزى مەن 2020 جىلدىڭ شىلدەسى ارالىعىندا جەنيەۆادا جالپى قۇنى 126 ملن شۆەيسار فرانكىن (شامامەن 69،7 ملرد تەڭگە) قۇرايتىن ءۇش جىلجىمايتىن مۇلىك نىسانىن ساتىپ العان. سولاردىڭ ءبىرى — اتاقتى بەلريۆ سارايى.
وتكەن اپتادا جەنيەۆا پروكۋراتۋراسى وسى مامىلەلەرگە قاتىستى قىلمىستىق ءىس بويىنشا تەرگەۋ جۇرگىزىپ جاتقانىن مالىمدەگەن ەدى.
