Qazaqstan Resei basshysy Vladimir Pýtindi tutqyndaýǵa order bergen Halyqaralyq qylmystyq sottyń sheshimin oryndamaidy. Qazaqstan syrtqy ister ministrliginiń 5 sáýir kúngi habarlamasynan osyny ańǵarýǵa bolady.
"Qazaqstan Gaagadaǵy Halyqaralyq qylmystyq sottyń quryltai qujaty – Rim statýtyna qatysýshy bolyp tabylmaidy. Tiisinshe, bul statýttyń Qazaqstanǵa qoldanysy taralmaidy jáne bizdiń memleketimiz ol boiynsha eshqandai mindetteme almaidy" dedi Qazaqstan syrtqy ister ministrliginiń resmi ókili Aibek Smadiiarov Azattyqqa jibergen resmi jaýabynda.
"Ýkrainanyń Resei basyp alǵan aýmaǵynan balalardy zańsyz tasymaldaǵany úshin" Halyqaralyq qylmystyq sot (Gaaga soty) naýryzdyń ortasynda Resei prezidenti Vladimir Pýtindi tutqyndaýǵa order bergen. Osyǵan uqsas order Reseidegi bala quqyǵyn qorǵaý jónindegi ombýdsmen Mariia Lvova-Belovaǵa da berildi.
Burynǵy sovet respýblikalary arasynda statýtty Baltyq elderi, Grýziia, Tájikstan ratifikatsiialaǵan. Jýyrda Armeniia konstitýtsiialyq soty Rim statýty eldiń konstitýtsiiasyna qaishy kelmeidi degen qaýly shyǵarǵan.
Rim statýtyn ratifikatsiialaǵan memleketterdiń biligi Pýtin sol elderdiń birine barǵan jaǵdaida ony tutqyndaýǵa mindetti.
Degenmen buǵan deiin resmi Erevan Pýtindi tutqyndamaitynyn meńzep, bul turǵyda Erevan Máskeýmen kelisim jasaýy múmkin ekenin de joqqa shyǵarmaǵan. Erevannyń túsindirýinshe, Armeniia Ázerbaijannyń Taýly Qarabaqtaǵy "áskeri qylmysyna" bailanysty Halyqaralyq qylmystyq sotqa shaǵym túsirgisi keledi.
Buǵan deiin Pýtin Qazaqstanǵa osy kúzde saparlap keletini habarlanǵan edi.
Reseige táýeldi Qazaqstan Reseidiń Ýkrainaǵa basqynshylyǵyn ashyq aiyptaǵan joq. Biraq Ýkrainanyń aýmaqtyq tutastyǵyn qoldaitynyn, Ýkrainanyń shyǵysyndaǵy separatistik qurylymdardy moiyndamaitynyn aitqan. BUU-da Resei basqynshylyǵyn aiyptaǵan qararlarǵa daýys berý kezinde Qazaqstan kóp jaǵdaida qalys qalady.
